Hyderabad: హైదరాబాద్ గచ్చిబౌలిలో ‘డిజిటల్ అరెస్ట్’ పేరుతో సైబర్ నేరగాళ్లు మరోసారి భారీ దోపిడీకి పాల్పడ్డారు. కేంద్ర రక్షణ మంత్రిత్వ శాఖలో ఉన్నత పదవిలో పనిచేసి రిటైర్ అయిన ఓ అధికారిని బెదిరించి, కేటుగాళ్లు ఏకంగా రూ. 72.30 లక్షలు కాజేశారు. గచ్చిబౌలి ఖాజాగూడకు చెందిన రిటైర్డ్ ఓఈఎఫ్ (OEF) డిప్యూటీ డైరెక్టర్ జనరల్ సుభాష్ కుమార్ ఆచార్య (69) ఈ సైబర్ వలలో చిక్కుకున్నారు. గత నెల 15న గుర్తుతెలియని వాట్సాప్ నంబర్ నుంచి ప్రదీప్ అనే వ్యక్తి కాల్ చేసి, సుభాష్ కుమార్ పేరుపై ముంబైలో కేసు నమోదైందని బెదిరించాడు. ‘డేటా బోర్డ్ ఆఫ్ ఇండియా’ పేరుతో అరెస్ట్ వారెంట్ జారీ అయిందని భయపెట్టడమే కాకుండా, ముంబై పోలీసు క్రైమ్ బ్రాంచ్ పేరుతో నకిలీ ఆర్డర్లను కూడా పంపించి నమ్మించారు. ఈ విషయాన్ని బయట ఎవరికీ చెప్పకూడదంటూ బాధితుడితో పాటు ఆయన భార్యతోనూ సైబర్ నేరగాళ్లు ఏకంగా ఒక హామీ పత్రం రాయించుకున్నారు.
ఆ తర్వాత మరో నేరస్తుడు ముంబై కొలాబా పోలీసు అధికారిగా వీడియో కాల్ చేసి, బాధితుడి బ్యాంకు ఖాతాల వివరాలను ఆరా తీసి పక్కా స్కెచ్ వేశాడు. బ్యాంకు లావాదేవీల పరిశీలన తర్వాత ఎటువంటి అక్రమాలు లేవని తేలితే డబ్బు తిరిగి వస్తుందని నమ్మించి, ఆర్‌టీజీఎస్ (RTGS) ద్వారా విడతలవారీగా డబ్బులు బదిలీ చేయించుకున్నారు. కేటుగాళ్ల బెదిరింపులకు భయపడిన సుభాష్ కుమార్, చివరకు తన భార్య బంగారు ఆభరణాలను ముత్తూట్ ఫైనాన్స్‌లో తాకట్టు పెట్టి గోల్డ్ లోన్ తీసుకుని మరీ వారి ఖాతాలకు జమ చేశారు. ఇలా అక్టోబర్ 15 నుంచి నవంబర్ 5 మధ్య తమిళనాడు, కేరళ తదితర రాష్ట్రాల బ్యాంకు ఖాతాలకు బాధితుడు మొత్తం రూ. 72.30 లక్షలు బదిలీ చేశారు. చివరకు ఈ నెల 11న తాను దారుణంగా మోసపోయినట్లు గ్రహించిన సుభాష్ కుమార్ ఆచార్య, సైబరాబాద్ సైబర్ క్రైమ్ పోలీసులను ఆశ్రయించారు. బాధితుడి ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు.