FIFA World Cup 2026: మెరినో మ్యాజిక్‌.. బెల్జియంపై 2-1 థ్రిల్లర్ విజయంతో సెమీస్‌లోకి స్పెయిన్.!

FIFA World Cup 2026: ఫిఫా ప్రపంచకప్ 2026లో స్పెయిన్ మరోసారి తన క్లాస్‌ను ఆట తీరును చూపించింది. క్వార్టర్ ఫైనల్‌లో బెల్జియంతో జరిగిన ఉత్కంఠభరిత పోరులో 2-1 తేడాతో గెలిచిన లా రొజా సెమీఫైనల్‌కు అర్హత సాధించింది. చివరి నిమిషాల్లో మికెల్ మెరినో గోల్‌తో స్పెయిన్ విజయం ఖాయం చేసుకుంది. ఇప్పటికే ఓసారి పోర్చుగల్‌పై కూడా ఇలాంటి కీలక సమయంలో గోల్ చేసి గెలిపించిన మెరినో.. మరోసారి నాకౌట్ హీరోగా నిలిచాడు.

మ్యాచ్ ప్రారంభం నుంచే స్పెయిన్ ఆధిపత్యం ప్రదర్శించింది. 30వ నిమిషంలో ఫాబియన్ రుయిజ్ గోల్‌తో స్పెయిన్ ముందంజలోకి వెళ్లింది. అయితే బెల్జియం వెంటనే జవాబు ఇచ్చింది. 41వ నిమిషంలో చార్లెస్ డి కెటెలారే గోల్ చేసి స్కోర్‌ను 1-1గా సమం చేశాడు. ఈ టోర్నీలో స్పెయిన్‌పై నమోదైన తొలి గోల్ ఇదే. రెండో అర్థభాగంలో ఇరుజట్లు గట్టిగా పోరాడినా గోల్ మాత్రం దొరకలేదు. మ్యాచ్ అదనపు సమయానికి వెళ్లేలా కనిపించిన సమయానికి 88వ నిమిషంలో ఆట అనుకోని మలుపు తిరిగింది. పౌ కుబార్సీ దూరం నుంచి కొట్టిన షాట్‌ను బెల్జియం గోల్‌కీపర్ సెన్నే లామెన్స్ సరిగా అడ్డుకోలేకపోయాడు. రీబౌండ్‌గా వచ్చిన బంతిని మెరినో చాకచక్యంగా నెట్‌లోకి పంపి స్పెయిన్‌కు విజయాన్ని అందించాడు. యువ సంచలనం లామిన్ యమాల్ మరోసారి అద్భుత ప్రదర్శనతో ‘ప్లేయర్ ఆఫ్ ది మ్యాచ్’ అవార్డు పొందాడు.

ఈ విజయంతో స్పెయిన్ తమ అజేయ పరంపరను 36 మ్యాచ్‌లకు పెంచుకుంది. నాకౌట్ మ్యాచ్‌ల్లో ఒత్తిడిని ఎదుర్కొంటూ గెలవగల జట్టుగా స్పెయిన్ మరింత బలంగా మారుతోంది. సరైన సమయానికి అవకాశాలను సద్వినియోగం చేసుకోవడం ఈ జట్టు ప్రత్యేకతగా మారింది. ఇక సెమీఫైనల్లో స్పెయిన్‌కు కఠిన పరీక్ష ఎదురుకానుంది. కైలియన్ ఎంబాపే నేతృత్వంలోని ఫ్రాన్స్‌తో స్పెయిన్ తలపడనుంది. ఇప్పటికే వరుసగా రెండు వరల్డ్ కప్ ఫైనల్స్‌కు చేరుకున్న ఫ్రాన్స్ బలమైన జట్టు. అయితే స్పెయిన్ కూడా పూర్తి స్థాయి ప్రదర్శనతో సెమీస్‌కు చేరుకోవడంతో ఈ మ్యాచ్ ఫైనల్‌కు సరిసమానంగా మారనుంది.