లోక్సభ ఎన్నికలకు మరికొంత సమయం మాత్రమే మిగిలి ఉంది. ఇందుకు సంబంధించి రాజకీయ పార్టీలతో పాటు ఎన్నికల సంఘం కూడా సన్నాహాలు ముమ్మరం చేసింది. ఈ క్రమంలో.. ఎన్నికల సంఘం కీలక నిర్ణయం తీసుకుంది. పోస్టర్లు, కరపత్రాలతో సహా ఎటువంటి ప్రచార సామాగ్రిలో పిల్లలను ఏ రూపంలో ఉపయోగించవద్దని ఎన్నికల సంఘం సోమవారం రాజకీయ పార్టీలను ఆదేశించింది. ఎన్నికల ప్రక్రియలో పార్టీలు కానీ.. అభ్యర్థులు కానీ ఏ విధంగానైనా పిల్లలను ఉపయోగించుకోవద్దని పేర్కొంది.
అంతేకాకుండా.. నాయకులు, అభ్యర్థులు ప్రచారంలో పిల్లలను ఎత్తుకోవడం, వాహనంలోనూ, ర్యాలీల్లోనూ పిల్లలను ఏ విధంగానూ ఉపయోగించుకోకూడదని కమిషన్ పేర్కొంది. కవిత్వం, పాటలు, మాట్లాడే పదాలు, రాజకీయ పార్టీ లేదా అభ్యర్థుల చిహ్నాల ప్రదర్శనతో సహా ఏ రూపంలోనైనా రాజకీయ ప్రచారానికి పిల్లలను ఉపయోగించద్దని ఎన్నికల కమిషన్ తెలిపింది.
అయితే ఎన్నికల ప్రచార కార్యక్రమాల్లో పాల్గొనని నాయకుడు, తన తల్లిదండ్రులు లేదా సంరక్షకుడి దగ్గర ఉన్నట్లయితే.. అది మార్గదర్శకాల ఉల్లంఘనగా పరిగణించబడదని కమిషన్ తెలిపింది. ఈ సందర్భంగా ప్రధాన ఎన్నికల కమిషనర్ రాజీవ్ కుమార్ మాట్లాడుతూ.. ఎన్నికల కమిషన్లో కీలకమైన వాటాదారులుగా రాజకీయ పార్టీల ముఖ్యమైన పాత్రను నిరంతరం నొక్కిచెప్పారు. ముఖ్యంగా రానున్న పార్లమెంట్ ఎన్నికలను దృష్టిలో ఉంచుకుని ప్రజాస్వామ్య విలువల పరిరక్షణలో చురుగ్గా పాల్గొనాలని ఆయన కోరారు.