America Currency: 165 ఏళ్ల సంప్రదాయానికి ఫుల్ స్టాప్.. ఇక అమెరికా కరెన్సీపై ట్రంప్ సంతకం..

అమెరికా కరెన్సీ నోట్లపై ఒక చారిత్రక మార్పు చోటుచేసుకోబోతోంది. అమెరికా చరిత్రలో మొదటిసారిగా.. అధికారంలో ఉన్న ఒక అధ్యక్షుడి సంతకం అక్కడి నోట్లపై ముద్రించనున్నారు. జూన్ నెల నుంచి డొనాల్డ్ ట్రంప్ సంతకంతో కూడిన డాలర్ నోట్లు చలామణిలోకి రానున్నాయని అమెరికా ట్రెజరీ విభాగం ధృవీకరించింది. దీనికి సంబంధించిన పూర్తి వివరాలు ఇలా ఉన్నాయి.

డాలర్ నోటుపై ట్రంప్ సంతకం ఎందుకు..?

అమెరికా స్వాతంత్ర్యం పొంది 250 ఏళ్లు పూర్తవుతున్న సందర్భంగా.. ఈ చారిత్రక మైలురాయిని గుర్తుచేసుకుంటూ ఈ నిర్ణయం తీసుకున్నారు. దేశ ఆర్థిక స్థిరత్వం, అభివృద్ధికి గుర్తుగా అధ్యక్షుడి సంతకాన్ని నోట్లపై చేర్చడం ఒక గౌరవంగా భావిస్తున్నట్లు ట్రెజరీ సెక్రటరీ స్కాట్ బెస్సెంట్ తెలిపారు. గత 161 ఏళ్లుగా కొనసాగుతున్న సంప్రదాయాన్ని మారుస్తూ.. ఇకపై ట్రెజరర్ సంతకం స్థానంలో అధ్యక్షుడి సంతకం కనిపిస్తుంది.

ఎప్పటి నుంచి అందుబాటులోకి వస్తాయి..?

జూన్ నెల నుంచి 100 డాలర్ల నోట్లపై ట్రంప్ , బెస్సెంట్ సంతకాలతో ముద్రణ ప్రారంభం కానుంది. తొలుత 100 డాలర్ల నోట్లు.. ఆ తర్వాత మిగిలిన అన్ని రకాల నోట్లపై ఈ మార్పులు చేస్తారు. ముద్రణ పూర్తయ్యాక.. ఫెడరల్ రిజర్వ్ వ్యవస్థ ద్వారా ఇవి సాధారణ ప్రజలకు, బ్యాంకులకు చేరుకోవడానికి కొన్ని వారాల సమయం పడుతుంది.

చట్టపరంగా ఇది సాధ్యమేనా..?

అమెరికా చట్టం ప్రకారం.. బతికున్న వ్యక్తుల చిత్రాలను నాణేలు లేదా నోట్లపై ముద్రించడం నిషిద్ధం. అందుకే గతంలో ట్రంప్ ముఖచిత్రంతో కూడిన నాణెం విడుదలకు ఆటంకం కలిగింది. అయితే, సంతకాల విషయంలో ట్రెజరీ విభాగానికి పూర్తి అధికారం ఉంటుంది. నోట్లపై ఉండే ‘ఇన్ గాడ్ వి ట్రస్ట్’ వంటి నినాదాలు లేదా పాత వ్యక్తుల చిత్రాలలో ఎటువంటి మార్పు ఉండదు.. కేవలం సంతకం చేసే అధికారి పేరు మాత్రమే మారుతుంది.

మిశ్రమ స్పందన..

1861 నుంచి నిరంతరాయంగా వస్తున్న ట్రెజరర్ సంతకం చేసే పద్ధతికి ఇప్పుడు స్వస్తి పలికారు. దీనిపై కొందరు మాజీ అధికారులు స్పందిస్తూ.. ఇది అమెరికా ఆర్థిక శక్తికి నిదర్శనమని ప్రశంసించగా.. మరికొందరు ఈ సుదీర్ఘ సంప్రదాయాన్ని పక్కన పెట్టడంపై మౌనంగా ఉన్నారు. ఏది ఏమైనా.. జూన్ నుంచి అమెరికా డాలర్ ఒక సరికొత్త రూపంలో ప్రపంచం ముందుకు రాబోతోంది.