Donald Trump: డోనాల్డ్ ట్రంప్ (Donald Trump) తన చైనా పర్యటన సందర్భంగా చేసిన వ్యాఖ్యలు ఇప్పుడు ప్రపంచవ్యాప్తంగా చర్చనీయాంశంగా మారాయి. చైనా అధ్యక్షుడు జి జిన్పింగ్ (Xi Jinping) అమెరికాను “క్షీణిస్తున్న దేశం”గా పేర్కొన్న విషయంపై స్పందించిన ట్రంప్.. “ఆ వ్యాఖ్య 100% సరైనదే” అని అన్నారు. అయితే ఆ వ్యాఖ్యలు తన పాలనకు కాకుండా మాజీ అధ్యక్షుడు జో బిడెన్ (Joe Biden) హయాంలోని పరిస్థితులకు సంబంధించినవని స్పష్టం చేశారు.
ట్రూత్ సోషల్లో చేసిన పోస్టులో ట్రంప్.. “బైడెన్ ప్రభుత్వ నాలుగేళ్ల పాలనలో అమెరికా తీవ్ర నష్టాన్ని చవిచూసింది. ఓపెన్ బోర్డర్స్, అధిక పన్నులు, తప్పు వాణిజ్య ఒప్పందాలు, పెరుగుతున్న నేరాలు, DEI విధానాలు వంటి అంశాలు దేశాన్ని బలహీనపరిచాయి” అని ఆరోపించారు. అలాగే తన పాలనలో అమెరికా మళ్లీ ప్రపంచంలో అత్యంత శక్తివంతమైన దేశంగా ఎదిగిందని ట్రంప్ పేర్కొన్నారు. స్టాక్ మార్కెట్లు రికార్డు స్థాయికి చేరుకున్నాయని, ఉద్యోగావకాశాలు భారీగా పెరిగాయని, విదేశీ పెట్టుబడులు ట్రిలియన్ల డాలర్లుగా అమెరికాలోకి వస్తున్నాయని తెలిపారు. సైనిక రంగంలోనూ అమెరికా బలంగా నిలిచిందని, ఇరాన్పై విజయం సాధించామని ఆయన వ్యాఖ్యానించారు.
వెనిజులాతో సంబంధాలు మెరుగుపడ్డాయని కూడా ట్రంప్ పేర్కొన్నారు. “రెండేళ్ల క్రితం అమెరికా నిజంగానే క్షీణించిన దేశంగా ఉండేది. ఆ విషయంలో జిన్పింగ్తో పూర్తిగా ఏకీభవిస్తున్నాను. కానీ ఇప్పుడు అమెరికా ప్రపంచంలోనే అత్యంత వేగంగా ఎదిగిన దేశంగా మారింది” అని ట్రంప్ తెలిపారు. ఇక భవిష్యత్తులో అమెరికా-చైనా సంబంధాలు మరింత బలపడతాయని ఆశాభావం వ్యక్తం చేశారు. తక్కువ సమయంలోనే తన ప్రభుత్వం సాధించిన విజయాలపై జిన్పింగ్ అభినందించారని కూడా ట్రంప్ వెల్లడించారు.