Cyclone Arnab: ‘అర్నబ్’ తుఫాను పేరు వెనుక అసలు కథ ఇదే.. పేరు పెట్టింది మన దేశం కాదు..

Cyclone Arnab: అర్నాబ్ తుఫాను ఆంధ్రప్రదేశ్ తీరాన్ని తాకింది. భారత వాతావరణ శాఖ (ఐఎమ్‌డి) ప్రకారం, అక్టోబర్ 28, 2026 ఉదయం, ఇది ఆంధ్ర తీరానికి దూరంగా పశ్చిమ-మధ్య బంగాళాఖాతంలో దాదాపు స్థిరంగా ఉంది. దీని కేంద్రం నర్సాపూర్‌కు 30 కిలోమీటర్ల తూర్పున, యానాంకు 45 కిలోమీటర్ల నైరుతి, కాకినాడకు 70 కిలోమీటర్ల నైరుతిలో ఉంది. ఇది ఇప్పుడు వాయువ్య దిశగా కదులుతూ బాపట్ల, విశాఖపట్నం మధ్య తీరాన్ని దాటుతుంది. గాలి వేగం గంటకు 115-125 కిలోమీటర్లు ఉండగా, ఈదురు గాలుల వేగం గంటకు 140 కిలోమీటర్ల వరకు చేరుకుంటుంది. తీరాన్ని తాకిన తర్వాత, అర్నాబ్ భూమిని సమీపించే కొద్దీ బలహీనపడటం పెరుగుతోంది. ఈ తుఫాను ప్రభావం ఒక్క ఆంధ్రప్రదేశ్‌కే పరిమితం కాకుండా ఒడిశా, జార్ఖండ్, పశ్చిమ బెంగాల్, ఉత్తరప్రదేశ్‌ల వరకు విస్తరించే అవకాశాలు ఉండటంతో ఆయా రాష్ట్రాలకు హెచ్చరికలు జారీ చేశారు. అసలు ఈ తుఫానుకు పేరు పెట్టింది ఎవరు? అనే అంశం వైరల్‌గా మారింది.

వ‘అర్నబ్‌’ (ఉచ్ఛారణ: ఆర్నబ్) అనే పేరును బంగ్లాదేశ్ సూచించింది. ఉత్తర హిందూ మహాసముద్ర పరిధిలోని తుఫాన్లకు పేర్లు పెట్టేందుకు ప్రపంచ వాతావరణ సంస్థ (WMO), ఐక్యరాజ్యసమితికి చెందిన ESCAP ప్యానెల్ సంయుక్తంగా ఒక వ్యవస్థను రూపొందించాయి. ఇందులో భారతదేశంతో పాటు బంగ్లాదేశ్, ఇరాన్, మాల్దీవులు, మయన్మార్, ఒమన్, పాకిస్తాన్, ఖతార్, సౌదీ అరేబియా, శ్రీలంక, థాయిలాండ్, యుఏఈ, యెమెన్ వంటి 13 దేశాలు భాగస్వామ్యంగా ఉన్నాయి. ఏప్రిల్ 2020లో ఆమోదించిన జాబితా ప్రకారం, ఈ 13 దేశాలు ప్రతిపాదించిన 52 పేర్లను వరసగా ఒక్కో తుఫానుకూ ఉపయోగిస్తారు. న్యూఢిల్లీలోని ప్రాంతీయ సమాచార కేంద్రం (IMD) తుఫాను తీవ్రతను బట్టి ఈ పేర్లను ప్రకటిస్తుంది. హెచ్చరికలు జారీ చేయడం, సమాచారాన్ని ప్రజలకు, అధికారులకు సులువుగా చేరవేయడమే ఈ నామకరణం వెనుక ఉన్న ప్రధాన ఉద్దేశం.

ఇక, తుఫాను ముప్పు ఎదుర్కొనేందుకు ఆంధ్రప్రదేశ్ ప్రభుత్వం భారీ స్థాయిలో సన్నాహాలు చేసింది. శ్రీకాకుళంతో పాటు ఉత్తర కోస్తా జిల్లాల్లో అప్పుడే ఈదురుగాలులు, భారీ వర్షాలు కురుస్తున్నాయి. 16 జిల్లాల్లోని 2,460 రెవెన్యూ గ్రామాలు, 92 పట్టణ ప్రాంతాలు ప్రమాదంలో పడే అవకాశం ఉన్నట్లు ముందుగానే గుర్తించారు. ప్రజల రక్షణ కోసం 1,763 పునరావాస కేంద్రాలను సిద్ధం చేసి, 2,907 కంట్రోల్ రూమ్‌లను ఏర్పాటు చేశారు. అంతేకాక 3,185 మంది నోడల్ అధికారులను, 11 ముప్పు ఎక్కువ ఉన్న జిల్లాల్లో NDRF, SDRF బృందాలను రంగంలోకి దించారు. తీర ప్రాంత రహదారులపై రాకపోకలు నిలిపివేయడంతో పాటు సముద్ర తీరాలకు (బీచ్‌లకు) ఎవరూ వెళ్లకుండా ఆంక్షలు విధించారు. దాదాపు 30,043 వేట పడవలను సురక్షితంగా హార్బర్లలో నిలిపివేశారు.