Agra Container: డ్రైవర్‌ లేకుండా రోడ్డుపై దూసుకెళ్లిన కంటెయినర్‌.. పరుగులు తీసిన జనాలు!

Container Ran on Road without Driver in Agra: ఉత్తరప్రదేశ్‌లోని ఆగ్రాలో ఓ కంటైనర్ డ్రైవర్ లేకుండానే రోడ్డుపై పరుగులు తీసింది. ట్రాన్స్ యమునా పోలీస్ స్టేషన్ పరిధిలోని టెడి బాగియా కూడలి సమీపంలో మంగళవారం సాయంత్రం ఈ ఘటన జరిగింది. సరుకులు తీసుకునేందుకు కిందకు దిగిన లారీ డ్రైవర్‌.. హ్యాండ్‌ బ్రేక్‌ వేయడం మరిచిపోవడంతో ఈ ప్రమాదం జరిగింది. డ్రైవర్ లేకుండా రోడ్డుపై వెళ్తున్న లారీని చూసి టెడి బాగియా కూడలి సమీపంలోని ప్రజలు భయాందోళనకు గురయ్యారు. ప్రాణాలను కాపాడుకునేందుకు పరుగులు పెట్టారు.

Also Read: ICC World Cup 2023: పాకిస్థాన్‌కు అంత సీన్ లేదు.. సెమీ ఫైనల్స్‌కు కూడా రాదు!

డ్రైవర్ లేకుండా లారీ రోడ్డుపై పరుగులు తీయడంతో టెడి బాగియా కూడలి ప్రాంతంలో గందరగోళం నెలకొంది. లారీ రోడ్డు పక్కనే ఉన్న ఓ మద్యం దుకాణంలోకి దూసుకెళ్లింది. మద్యం దుకాణంలోకి వెళ్లే క్రమంలో రెండు కార్లు, మూడు బైక్‌లను లారీ ఢీ కొట్టింది. ఈ ఘటనలో కొంతమంది ద్విచక్ర వాహనదారులతో పాటు ఓ చిన్నారికి స్వల్ప గాయాలయ్యాయి. విషయం తెలుసుకున్న పోలీసులు చిన్నారిని చికిత్స నిమిత్తం ఆస్పత్రికి తరలించారు. ఇక డ్రైవర్‌ను అదుపులోకి తీసుకుని విచారించారు. హ్యాండ్‌బ్రేక్‌ వేయడం మరచిపోవడంతో ఈ ప్రమాదం జరిగిందని డ్రైవర్ తెలిపాడు.