China Covid: కొవిడ్కు పుట్టినిల్లు అయిన చైనాలో మహమ్మారి తన ప్రతాపాన్ని చూపిస్తోంది. దాదాపు ఒక్క నెలలోనే కొవిడ్ సోకి 60 వేల మంది ప్రాణాలు కోల్పోయారని చైనా ఆరోగ్య శాఖ అధికారులు నివేదించారు. డిసెంబర్ ప్రారంభంలో కొవిడ్ ఆంక్షలను సడలించిన తర్వాత మొదటి సారిగా ప్రభుత్వం మరణాల సంఖ్యను విడుదల చేసింది. డిసెంబర్ 8, 2022 నుంచి జనవరి 12, 2023 మధ్య చైనాలో 59,938 కొవిడ్ సంబంధిత మరణాలు నమోదయ్యాయని నేషనల్ హెల్త్ కమిషన్ ఆధ్వర్యంలోని బ్యూరో ఆఫ్ మెడికల్ అడ్మినిస్ట్రేషన్ అధిపతి జియావో యాహుయ్ విలేకరుల సమావేశంలో తెలిపారు. ఈ సంఖ్య వైద్య సదుపాయాల వద్ద అంటే ఆస్పత్రుల్లో నమోదైన మరణాలను మాత్రమే సూచిస్తుంది. మొత్తం సంఖ్య ఎక్కువగా ఉండే అవకాశం ఉంది.
ఇందులో వైరస్ కారణంగా నేరుగా శ్వాసకోశ వైఫల్యం వల్ల సంభవించిన 5,503 మరణాలు కాగా.. కొవిడ్తో కలిపి అంతర్లీన వ్యాధుల వల్ల 54,435 మరణాలు సంభవించాయని జియావో చెప్పారు. డిసెంబర్ ప్రారంభంలో జీరో-కోవిడ్ విధానాన్ని విడిచిపెట్టినప్పటి నుంచి చైనా వైరస్ మరణాల సంఖ్యను తక్కువగా నివేదించిందని ఆరోపించారు. చైనా గతంలో కొవిడ్ మరణాలను వర్గీకరించడానికి దాని పద్ధతిని సవరించింది. ఇది వైరస్ వల్ల కలిగే శ్వాసకోశ వైఫల్యంతో ప్రత్యేకంగా మరణించేవారిని మాత్రమే లెక్కిస్తుంది. అయితే దీనిని ప్రపంచ ఆరోగ్య సంస్థ విమర్శించింది.
Pakistan: పోలీస్ స్టేషన్పై తాలిబన్ల దాడి.. ముగ్గురు పాక్ పోలీసులు మృతి
చైనాలో మరణించిన వారిలో ఎక్కువగా 65 సంవత్సరాల కంటే అధిక వయస్సు గలవారే 90 శాతానికి పైగా ఉన్నారని తెలిసింది. చాలా మంది అంతర్లీన వ్యాధులతో బాధపడుతున్నారని వారు చెప్పారు. చైనాలో 60 ఏళ్లు పైబడిన లక్షలాది మందికి టీకాలు వేయలేదు.
