Chaminda Vaas: ఐపీఎల్‌లో తొలిసారి కోచ్‌గా శ్రీలంక దిగ్గజం.. ఢిల్లీ క్యాపిటల్స్ కీలక బాధ్యతలు అప్పగింత..!

Chaminda Vaas: శ్రీలంక మాజీ ఆల్‌రౌండర్ చమిందా వాస్‌కు ఐపీఎల్‌లో తొలిసారి కోచింగ్ అవకాశం దక్కింది. 2027 ఐపీఎల్ సీజన్‌కు ఢిల్లీ క్యాపిటల్స్ తమ ఫాస్ట్ బౌలింగ్ కోచ్‌గా వాస్‌ను నియమించింది. దీంతో కొత్త కోచింగ్ బృందంలో ఆయన కీలక బాధ్యతలు చేపట్టనున్నారు. శ్రీలంక తరఫున అద్భుత రికార్డు కలిగిన వాస్.. టెస్టుల్లో 355 వికెట్లు, వన్డేల్లో 400 వికెట్లు పడగొట్టారు. ఢిల్లీ క్యాపిటల్స్ కొత్త హెడ్ కోచ్ సౌరవ్ గంగూలీ నేతృత్వంలోని కోచింగ్ బృందంలో వాస్ జాతకానున్నారు. ఇటీవలే యువరాజ్ సింగ్‌ను అసిస్టెంట్, బ్యాటింగ్ కోచ్‌గా ఢిల్లీ నియమించిన సంగతి తెలిసిందే.

గత రెండు సీజన్లలో ఢిల్లీ క్యాపిటల్స్ బౌలింగ్ కోచ్‌గా పనిచేసిన మునాఫ్ పటేల్ స్థానంలో చమిందా వాస్ కీలక బాధ్యతలు స్వీకరించనున్నారు. 52 ఏళ్ల వాస్ గతంలో శ్రీలంక పురుషుల జట్టుకు మూడు విడతల్లో బౌలింగ్ కోచ్‌గా సేవలందించారు. వాస్ కోచింగ్ కెరీర్ న్యూజిలాండ్‌తో ప్రారంభమైంది. ఆ తర్వాత 2013 నుంచి 2015 వరకు శ్రీలంక జట్టుకు కోచ్‌గా పనిచేశారు. 2016 టీ20 ప్రపంచకప్ సమయంలో ఐర్లాండ్ బౌలింగ్ కోచ్‌గా బాధ్యతలు చేపట్టిన ఆయన.. ఆ తర్వాత మరోసారి శ్రీలంక కోచింగ్ బృందంలో చేరారు. ఆటగాడిగా కూడా వాస్‌కు ఐపీఎల్ అనుభవం ఉంది. 2008 నుంచి 2010 వరకు డెక్కన్ ఛార్జర్స్ తరఫున ఆడిన ఆయన.. 13 మ్యాచ్‌ల్లో 18 వికెట్లు పడగొట్టారు. ఇప్పుడు తొలిసారి ఐపీఎల్‌లో కోచ్‌గా అడుగుపెట్టనున్న వాస్.. ఢిల్లీ క్యాపిటల్స్ పేస్ బౌలింగ్ విభాగాన్ని మరింత బలోపేతం చేయడంపై దృష్టి పెట్టనున్నారు.

World Cup winner and Sri lanka’s best ever 🔥

Welcome to Tiger Territory, coach 💙❤️ https://t.co/SuVQ9rGHuO

— Delhi Capitals (@DelhiCapitals) October 17, 2026