NOIDA LOVE DEATH: వారిద్దరూ ప్రేమించుకున్నారు.. కలిసి బతుకుదామని నిర్ణయించుకున్నారు.. ఇంతలోనే

వారిద్దరూ ప్రేమించుకున్నారు.. కలిసి బతుకుదామని నిర్ణయించుకున్నారు.. ఇంతలో ఏం జరిగిందో ఏమో హఠాత్తుగా విగతజీవులుగా కారులో పడి ఉన్నారు. ప్రేమికుల రోజునే వెలుగులోకి వచ్చిన ఈ ఘటన నోయిడాలో జరిగింది. అసలు ఆ ప్రేమికులకు వచ్చిన కష్టమేంటి? వారు ఎలా చనిపోయారు? పోలీసులు ఏం చెబుతున్నారు?

Also Read:Peddi Update: గ్రౌండ్‌లోకి దిగిన గ్లోబల్ స్టార్ టీమ్.. స్పోర్ట్స్ షెడ్యూల్‌తో బిజీగా ఉన్న ‘పెద్ది’ !

అది నోయిడా సెక్టార్ 107.. పట్టపగలే కాల్పుల శబ్దం.. ధనాధన్.. రెండు బుల్లెట్లు కాల్చిన సౌండ్.. ఈ కాల్పుల శబ్దంతో ఒక్కసారిగా స్థానికులు ఉలిక్కి పడ్డారు. శబ్దాలు ఎక్కడి నుంచి వచ్చాయని చూసే సరికి ఓ కారు నుంచి వినిపించినట్లుగా గుర్తించారు.. స్థానికులు కారు వద్దకు చేరుకునే సరికి.. జంట శవాలు కనిపించాయి. దీంతో వెంటనే స్థానిక పోలీసులకు సమాచారం ఇచ్చారు. పోలీసులు వచ్చి.. కారు లోపలి నుంచి లాక్ చేసి ఉన్నట్లుగా గుర్తించారు. వెంటనే అద్దాలు పగులగొట్టి ఇద్దరినీ బయటకు తీశారు. వారు అప్పటికే చనిపోయి ఉన్నారు.

కారులో ఉన్న వ్యక్తి చేతిలో పిస్టల్ ఉన్నట్లు గుర్తించారు పోలీసులు. దాంతోపాటు కారులో రెండు వాడకుండా ఉన్న ఖాళీ కార్ట్రిడ్జ్‌లను సైతం పోలీసులు స్వాధీనం చేసుకున్నారు. వారిద్దరికి చెందిన మొబైల్ ఫోన్స్ కూడా స్వాధీనం చేసుకున్నారు. ఈ ఘటనలో హత్య.. ఆ తర్వాత ఆత్మహత్య జరిగినట్లు పోలీసులు ప్రాథమికంగా గుర్తించారు. చనిపోయిన మహిళ పేరు 26 ఏళ్ల రేఖగా గుర్తించారు. ఆమె నోయిడా సెక్టార్ 58లో తల్లిదండ్రులతో కలిసి నివసిస్తోంది. కారులో చనిపోయి ఉన్న వ్యక్తి ఢిల్లీలోని త్రిలోక్‌పురికి చెందిన సుమిత్ అని చెబుతున్నారు పోలీసులు.

రేఖ.. శుక్రవారం ఉదయం నుంచి కనిపించడం లేదు. తెలిసిన వాళ్ల ఇళ్లు, బంధువులను వాకబు చేసిన తల్లిదండ్రులు చివరికి రాత్రి పోలీసులకు ఫిర్యాదు చేశారు. కానీ నోయిడా సెక్టార్ 107లో శవంగా కనిపించే సరికి తల్లిదండ్రులు కన్నీరుమున్నీరుగా విలపిస్తున్నారు. మరోవైపు సుమిత్ తండ్రి రాజీవ్ ఢిల్లీ మున్సిపల్ కార్పొరేషన్‌లో ఉద్యోగం చేస్తున్నారు. సుమిత్, రేఖ పాఠశాలలో కలిసి చదువుకున్నట్లుగా తెలుస్తోంది. వారు అప్పటి నుంచే.. అంటే దాదాపు 15 ఏళ్ల నుంచి ఒకరినొకరు ప్రేమించుకుంటున్నారు.

సుమిత్ క్రికెట్ ఆడటమే కాకుండా వాటర్ ప్లాంట్ వ్యాపారాన్ని కూడా నిర్వహించేవాడని బంధువులు చెబుతున్నారు. అంతే కాదు.. తాను ప్రాణానికి ప్రాణంగా ప్రేమించిన రేఖ కోసం దాదాపు కోటి రూపాయల విలువైన ఫ్లాట్ కొన్నాడని తెలిపారు. త్వరలో వివాహం చేసుకోవాలని ఇద్దరూ నిర్ణయించుకున్న తరుణంలోనే ఇలా జరగడంపై సుమిత్ తల్లిదండ్రులు కన్నీరుమున్నీరుగా విలపిస్తున్నారు.

Also Read:Mahashivratri 2026 Puja Samagri List: మహాశివరాత్రి పూజకు అవసరమైన పూజా సామాగ్రి పూర్తి లిస్ట్ ఇదిగో..

ఘటనా స్థలం నుంచి DL 14 CL 6473 నంబర్ గల కారును స్వాధీనం చేసుకున్నారు పోలీసులు. ఈ కేసులో అన్ని కోణాల్లోనూ దర్యాప్తు చేస్తున్నట్లు చెబుతున్నారు. ఐతే ప్రేమికుల రోజునే ఇద్దరూ చనిపోవడంపై స్థానికులు ఆవేదన వ్యక్తం చేస్తున్నారు.