Arnab Cyclone-School Holiday: తెలంగాణలోనూ తుఫాను ప్రభావం.. ఈ జిల్లాలో స్కూళ్లు, కాలేజీలకు సెలవు..

Arnab Cyclone-School Holiday: బంగాళాఖాతంలో రూపుదిద్దుకున్న ‘అర్నాబ్’ తుఫాను తెలంగాణపై కూడా ప్రభావాన్ని చూపుతోంది. ఈ తుఫాను ధాటికి బుధవారం నాడు భద్రాద్రి కొత్తగూడెం, ఖమ్మం, మహబూబాబాద్, ములుగు జిల్లాల్లో అత్యంత భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం స్పష్టం చేసింది. ఈ ప్రతికూల వాతావరణ పరిస్థితుల వల్ల సాధారణ జనజీవనానికి తీవ్ర అంతరాయం కలగడమే కాకుండా, విద్యార్థులు, విద్యా సిబ్బంది భద్రతకు ముప్పు వాటిల్లే ప్రమాదం ఉందని జిల్లా యంత్రాంగం భావించింది. ఈ నేపథ్యంలో ముందస్తు భద్రతా చర్యల్లో భాగంగా అక్టోబర్ 28న భద్రాద్రి కొత్తగూడెం జిల్లాలోని అన్ని పాఠశాలలు, కళాశాలలు, అంగన్‌వాడీ కేంద్రాలకు ఒక రోజు సెలవు ప్రకటిస్తూ జిల్లా కలెక్టర్ అంకిత్ మంగళవారం రాత్రి కీలక ఉత్తర్వులు జారీ చేశారు.

మరోవైపు ఈ తుఫాను బుధవారం ఉదయం ఆంధ్రప్రదేశ్-యానాం ప్రాంతాల మధ్య తీరం దాటే అవకాశం ఉందని, ఒకవేళ అది తన దిశను మార్చుకుంటే నెల్లూరు-మచిలీపట్నం మధ్య తీరాన్ని తాకొచ్చని భారత వాతావరణ శాఖ హెచ్చరించింది. అర్నాబ్ ప్రభావంతో తెలంగాణలోని సూర్యపేట, జయశంకర్ భూపాలపల్లి జిల్లాల్లో భారీ వర్షాలు, వరంగల్, హనుమకొండ జిల్లాల్లో మోస్తరు వర్షాలు కురిసే సూచనలు కనిపిస్తున్నాయి. అలాగే గురువారం నాటికి ఈ తుఫాను ప్రభావం ఆదిలాబాద్, నిర్మల్, నిజామాబాద్, కుమురం భీం ఆసిఫాబాద్, మంచిర్యాల జిల్లాలకు విస్తరించి, ఈదురుగాలులతో కూడిన వర్షాలు పడే అవకాశం ఉందని వాతావరణ నిపుణులు అంచనా వేస్తున్నారు.