AP Liquor Shops: ఏపీలో మ‌ద్యం షాపుల‌కు నోటిఫికేష‌న్ విడుద‌ల‌.. తేదీ, పూర్తి వివరాలు ఇవే..

AP Liquor Shops: ఆంధ్రప్రదేశ్‌లో ఖాళీగా ఉన్న మద్యం షాపుల కేటాయింపునకు సంబంధించి ఎక్సైజ్ శాఖ నోటిఫికేషన్ విడుదల చేసింది. రాష్ట్రవ్యాప్తంగా మొత్తం 3,650 ఏ4 మద్యం షాపులను రెన్యువల్ కోసం నోటిఫై చేయగా, నిన్న అర్ధరాత్రితో రెన్యువల్ గడువు ముగిసింది. ఈ ప్రక్రియలో రాష్ట్రవ్యాప్తంగా 3,236 మద్యం షాపులను ప్రస్తుతం ఉన్న యజమానులే తిరిగి రెన్యువల్ చేసుకున్నారు. అయితే, 414 మద్యం షాపుల యజమానులు రెన్యువల్‌కు ముందుకు రాలేదు. దీంతో రెన్యువల్ కాకుండా మిగిలిపోయిన ఈ 414 షాపులతో పాటు, గతంలో కేటాయించకుండా మిగిలిన షాపులను కూడా కలుపుకొని మొత్తం 807 మద్యం షాపులకు ఎక్సైజ్ శాఖ నూతన నోటిఫికేషన్ ఇచ్చింది. ఈ 807 షాపులకు అక్టోబర్ 1వ తేదీ అర్ధరాత్రి వరకు దరఖాస్తులను స్వీకరించనున్నారు. అనంతరం అక్టోబర్ 3న స్వీకరించిన దరఖాస్తుల పరిశీలన చేపడతారు. పరిశీలన పూర్తయిన తర్వాత పారదర్శకంగా లాటరీ పద్ధతి ద్వారా అర్హులైన అభ్యర్థులకు ఏపీ ఎక్సైజ్ శాఖ మద్యం షాపులను కేటాయించనుంది.