Smart Roads: వాహనదారులకు శుభవార్త.. అమరావతిలో సరికొత్త స్మార్ట్ రోడ్లు.. ఈ ప్రాంతాల్లో..

ఆంధ్రప్రదేశ్ రాజధాని అమరావతిలో సరికొత్త రోడ్ల నిర్మాణానికి ఏపీసీఆర్డీఏ శ్రీకారం చుట్టింది. భవిష్యత్ అవసరాలకు అనుగుణంగా గ్రీన్ మొబిలిటీకి పెద్దపీట వేస్తూ పాదచారులు, సైక్లిస్టుల కోసం ప్రత్యేక రహదారులను అభివృద్ధి చేస్తున్నారు. ప్రస్తుతం N9 రోడ్డు సమీపంలో మోడల్ వాకింగ్, సైక్లింగ్ ట్రాక్‌‌ల నిర్మాణం జరుగుతోంది. సాధారణ నగరాల్లో మాదిరిగా కేవలం వాహనాల మార్గమే కాకుండా, మాస్టర్‌ప్లాన్‌లో నాన్-మోటరైజ్డ్ ట్రాన్స్‌పోర్ట్‌కు అత్యంత ప్రాధాన్యత కల్పించారు. కారు లేదా బైక్ లేకపోయినా సురక్షితంగా ప్రయాణించేలా ఈ స్మార్ట్ రోడ్లను డిజైన్ చేస్తున్నారు.

ఈ ప్రత్యేక స్మార్ట్ రోడ్లలో 3 మీటర్ల ఫుట్‌పాత్, 3 మీటర్ల సైకిల్ ట్రాక్, వీటి మధ్య మరో 3 మీటర్ల గ్రీన్ బెల్ట్ ఉండేలా ప్రణాళిక రూపొందించారు. ఫుట్‌పాత్‌ను సైకిల్ ట్రాక్ కంటే కొంత ఎత్తులో లేదా ఒకే స్థాయిలో ఉంచే రెండు రకాల డిజైన్లను అధికారులు పరిశీలిస్తున్నారు. సైక్లిస్టులకు ప్రత్యేక గుర్తింపు ఉండేలా ప్రత్యేక రంగులు లేదా పిగ్మెంటేషన్‌ను ఉపయోగించనున్నారు. దీనివల్ల ఏది వాహనాల మార్గం, ఏది సైకిల్ లేదా పాదచారుల మార్గం అనేది స్పష్టంగా తెలుస్తుంది. అంతేకాకుండా.. స్టార్మ్ వాటర్ డ్రైన్ల పైన సైకిల్ ట్రాక్‌లు, ఐసీటీ యుటిలిటీ డక్ట్లు, సీవర్ లైన్ల పైన పాదచారుల మార్గాలను ఏర్పాటు చేసే వినూత్న విధానాన్ని పరిశీలిస్తున్నారు. రోడ్డు, డ్రైనేజీ,  పాదచారులు, సైకిల్ ట్రాక్‌లన్నింటినీ ఒకే సమగ్ర డిజైన్‌లో ఇక్కడ అమర్చుతున్నారు.

ఏపీసీఆర్డీఏ ప్రణాళిక ప్రకారం అమరావతిలో సుమారు 3,200 కిలోమీటర్ల మేర పాదచారుల మార్గాలు, సైకిల్ ట్రాక్‌ల నెట్‌వర్క్‌ను అభివృద్ధి చేయనున్నారు. పార్కులు, ఓపెన్ స్పేస్‌లు, గ్రీన్ ఏరియాలను ఈ నెట్‌వర్క్‌తో అనుసంధానం చేయనున్నారు. వ్యక్తిగత వాహనాల వినియోగం పెరిగే కొద్దీ ట్రాఫిక్ ఒత్తిడి, కాలుష్యాన్ని తగ్గించేందుకు నడక, సైక్లింగ్, ప్రజా రవాణాను మిళితం చేసి గ్రీన్ మొబిలిటీని లక్ష్యంగా పెట్టుకున్నారు. ఈ స్మార్ట్ రోడ్లలో అందమైన టైల్స్‌తో పాటు భద్రత, వెలుతురు, వర్షపు నీటి పారుదల, ట్రాఫిక్ నియంత్రణ వంటి అంశాలకు కూడా అత్యంత ప్రాధాన్యత ఇస్తున్నారు. అమరావతి మొత్తం ఈ స్మార్ట్ రోడ్లు విస్తరిస్తే, రాజధాని రూపురేఖలతో పాటు ప్రజల ప్రయాణ విధానం పూర్తిగా మారిపోనుంది.