Sonam Wangchuk: గతేడాది లడఖ్లోని లేహ్లో అల్లర్లు జరిగాయి. ఈ అల్లర్ల వెనక ఉన్నాడనే ఆరోపణలపై ప్రముఖ పర్యావరణ కార్యకర్త సోనమ్ వాంగ్చుక్ను జాతీయ భద్రతా చట్టం (NSA) కింద దాదాపుగా 6 నెలలుగా నిర్బంధంలో ఉంచారు. అయితే, ఇప్పుడు ఆయనకు విడుదల లభించింది. వాంగ్చుక్ విడుదల కానున్నట్లు కేంద్ర హోంమంత్రిత్వ శాఖ తెలిపింది. సముచిత పరిశీలన తర్వాత, NSA కింద అందుబాటులో ఉన్న అధికారాలను వినియోగించుకుంటూ వాంగ్చుక్ నిర్బంధాన్ని రద్దు చేయాలని మంత్రిత్వ శాఖ నిర్ణయించింది.
NSA కింద నిర్బంధ కాలంలో దాదాపు సగం సమయాన్ని వాంగ్చుక్ పూర్తి చేశారని కేంద్ర ప్రభుత్వం తన ప్రకటనలో పేర్కొంది. లడఖ్లో శాంతి, స్థిరత్వం, పరస్పర విశ్వాసం కూడిన వాతావరణాన్ని సృష్టించడానికి ప్రభుత్వం పూర్తిగా కట్టుబడి ఉందని చెప్పింది. సంబంధిత అన్ని వర్గాలతో నిర్మాణాత్మక, అర్థవంతమైన చర్చల్ని సులభతరం చేసేందుకు ఈ నిర్ణయం తీసుకున్నట్లు మంత్రిత్వ శాఖ తెలిపింది.
Read Also: Iran War: యుద్ధం తీవ్రం .. మెరైన్ కమాండోలు, F-35Bలను తెస్తున్న అమెరికా..
లడఖ్ డిమాండ్లకు సంబంధించి కొనసాగుతున్న ప్రతిష్టంభనను పరిష్కరించడంలో ఈ చర్య సహాయపడుతుందని ప్రభుత్వం విశ్వసిస్తోంది. గత కొంతకాలంగా, రాజ్యాంగంలోని ఆరవ షెడ్యూల్లో లడఖ్ను చేర్చడం, రాష్ట్ర హోదా కల్పించడం వంటి డిమాండ్ల కోసం కొనసాగుతున్న ఉద్యమానికి సోనమ్ వాంగ్చుక్ నాయకత్వం వహిస్తున్నారు.
ఈ నేపథ్యంలోనే రాష్ట్ర హోదా కోరుతూ, గతేడాది లడఖ్ వ్యాప్తంగా భారీ నిరసనలు జరిగాయి. ఈ ఆందోళనలు హింసాత్మకంగా మారడంతో నలుగురు మరణించారు. పదుల సంఖ్యలో గాయపడ్డారు. ముఖ్యంగా, అధికారులను, బీజేపీ కార్యాలయాన్ని టార్గెట్ చేస్తూ ఆందోళనకారులు దాడులకు తెగబడ్డారు. బీజేపీ కార్యాలయానికి నిప్పుపెట్టారు. సీఆర్పీఎఫ్ వాహనాన్ని తగలబెట్టారు. అందులో ఒక సీఆర్పీఎఫ్ సిబ్బందిని కాల్చే ప్రయత్నం చేశారు. ఈ అల్లర్లు జరిగిన రెండు రోజుల తర్వాత, అల్లర్లను ప్రేరేపించిన కారణంగా సోనమ్ వాంగ్చుక్ని అరెస్ట్ చేశారు. ఇప్పుడు చాలా నెలల నిర్బంధం తర్వాత విడుదల చేస్తు్న్నారు.