RBI Repo Rate: ఆర్‌బీఐ నుంచి భారీ షాక్.? రెపో రేటు పెంపుపై కీలక అంచనా.!
- ద్రవ్యోల్బణంతో పెరుగుతున్న ఒత్తిడి
- 5.54 శాతానికి చేరిన రిటైల్ ద్రవ్యోల్బణం
- రెపో రేటు పెంపునకు రెండు మార్గాలు
- 6.5 శాతానికి చేరొచ్చని ద్రవ్యోల్బణ అంచనా
- Follow Us :
-
-
Add as a preferred
source on google
దేశంలో పెరుగుతున్న ద్రవ్యోల్బణాన్ని అణచివేయడానికి రిజర్వ్ బ్యాంక్ ఆఫ్ ఇండియా (RBI) రాబోయే డిసెంబర్ నెలలో జరిగే ద్రవ్య పరపతి విధాన కమిటీ (MPC) సమావేశంలో సంచలన నిర్ణయం తీసుకునే అవకాశం ఉంది. రెపో రేటును ఏకంగా 50 బేసిస్ పాయింట్ల మేర భారీగా పెంచే అంశాన్ని ఆర్‌బీఐ పరిశీలించే అవకాశం ఉందని ఎస్బీఐ రీసెర్చ్ (SBI Research) తన తాజా నివేదికలో వెల్లడించింది. దేశంలో ధరల పెరుగుదల ఒత్తిళ్లు కేవలం కొన్ని వస్తువులకే పరిమితం కాకుండా, మొత్తం వినియోగ వస్తువుల బాస్కెట్ అంతటా విస్తరిస్తున్న నేపథ్యంలో కేంద్ర బ్యాంకు ఈ కఠిన చర్యలు తీసుకునే అవకాశం ఉన్నట్లు అంచనా వేసింది.
పెరుగుతున్న రిటైల్ , ఆహార ధరల ద్రవ్యోల్బణం
అనుకున్న విధంగానే సెప్టెంబర్ నెలలో రిటైల్ ద్రవ్యోల్బణం 5.54 శాతానికి పెరిగింది. ముఖ్యంగా కూరగాయల ధరలు ఎగబాకడంతో ఆహార ద్రవ్యోల్బణం ఏకంగా 7.74 శాతానికి చేరుకుంది. ఉల్లిపాయలు, అల్లం, వెల్లుల్లి, నిమ్మకాయల ధరలు విపరీతంగా పెరగడమే ఇందుకు ప్రధాన కారణమని నివేదిక పేర్కొంది. గ్రామీణ ప్రాంతాల్లో ద్రవ్యోల్బణం రేటు ఆర్‌బీఐ నిర్దేశిత సహన స్థాయి అయిన 6 శాతాన్ని దాటి 6.08 శాతంగా నమోదైంది. అదే సమయంలో పట్టణ ప్రాంతాల్లో ఇది కాస్త తక్కువగా 4.88 శాతంగా ఉంది.
ఆర్‌బీఐ ముందున్న రెండు కీలక ప్రత్యామ్నాయాలు
ద్రవ్యోల్బణాన్ని కట్టడి చేసేందుకు కేంద్ర బ్యాంకు ముందు ప్రధానంగా రెండు మార్గాలు ఉన్నట్లు ఎస్బీఐ రీసెర్చ్ విశ్లేషించింది. మొదటి మార్గంగా.. డిసెంబర్ సమావేశంలో రెపో రేటును 25 బేసిస్ పాయింట్లు పెంచడంతో పాటు, మార్జినల్ స్టాండింగ్ ఫెసిలిటీ (MSF) రేటును 5.75 శాతం నుంచి 6 శాతానికి, ఆ తర్వాత 6.25 శాతానికి పెంచే క్రమబద్ధమైన పద్ధతిని అనుసరించవచ్చు. రెండో మార్గంగా.. ద్రవ్యోల్బణ కట్టడిపై తనకున్న బలమైన నిబద్ధతను చాటేందుకు డిసెంబర్ పాలసీలో నేరుగా 50 బేసిస్ పాయింట్ల భారీ పెంపునకు ఆర్‌బీఐ మొగ్గు చూపవచ్చు. అయితే ఈ రెండు ప్రత్యామ్నాయాల్లో దేనిని ఎంచుకోవాలనేది ద్రవ్యోల్బణం ఎంతకాలం కొనసాగుతుంది , రూపాయి మారకం విలువ గమనంపై ఆధారపడి ఉంటుందని నిపుణులు అభిప్రాయపడ్డారు.
సరఫరా వైపు నుంచి ఎదురుకానున్న సవాళ్లు.. ద్రవ్యోల్బణ అంచనాలు
ద్రవ్యోల్బణాన్ని అదుపు చేయడమే తమ ప్రధాన ప్రాధాన్యత అని, తాత్కాలిక సరఫరా షాక్‌లు దీర్ఘకాలిక ధరల పెరుగుదలకు దారి తీయకుండా చూస్తామని ఆర్‌బీఐ గవర్నర్ సంజయ్ మల్హోత్రా స్పష్టం చేశారు. ఎస్బీఐ రీసెర్చ్ అంచనా ప్రకారం.. రాబోయే త్రైమాసికంలో (Q3) రిటైల్ ద్రవ్యోల్బణం సుమారు 6.5 శాతానికి, ఆ తర్వాత (Q4) 5.6 శాతానికి చేరవచ్చు. అలాగే FY27 సగటు ద్రవ్యోల్బణం 5.3 శాతంగా ఉంటుందని అంచనా వేశారు. వర్షాభావ పరిస్థితులు, ఎల్ నినో ప్రభావం, అధిక శక్తి వనరులు , ఇంధన ధరల పెరుగుదల వంటి కారణాల వల్లే ఈ అంచనాలు నమోదవుతున్నట్లు నివేదిక వెల్లడించింది.