లోక్సభ ప్రతిపక్ష నేత, కాంగ్రెస్ అగ్ర నేత రాహుల్ గాంధీ విదేశీ పర్యటనలను లక్ష్యంగా చేసుకుని బీజేపీ విమర్శలు గుప్పించింది. అయితే ఈసారి బీజేపీ వినూత్నంగా స్పందించింది.. ప్రముఖ బాలీవుడ్ చిత్రాల పోస్టర్లను మార్ఫింగ్ చేసి రాహుల్ గాంధీపై వ్యంగ్య పోస్టులను సోషల్ మీడియాలో విడుదల చేసింది. ఎన్నికలు ముగిసిన వెంటనే రాహుల్ విదేశాలకు వెళ్లిపోతారని ఆరోపిస్తూనే ఆచూకీపై ప్రశ్నలు లేవనెత్తింది.
బీజేపీ తన అధికారిక సోషల్ మీడియా వేదిక ‘ఎక్స్’లో చేసిన పోస్టులో.. “దేశంలో ఎన్నికలు రాగానే ప్రచారం.. ఎన్నికలు ముగిశాక విదేశాలకు విమానం ఎక్కడం.. ఇదే రాహుల్ గాంధీ అసలు గుర్తింపు. రాజకీయాల్లో గెలుపు, ఓటమి మాత్రమే కాదు.. ప్రజల పట్ల బాధ్యత కూడా ముఖ్యం. కానీ రాహుల్ గాంధీ రాజకీయాలు ఎన్నికల వరకు మాత్రమే పరిమితం. దేశ ప్రజలతో ఆయనకు ఎలాంటి అనుబంధం లేదు” అంటూ విమర్శలు గుప్పించింది. అంతేకాకుండా పలు రాష్ట్ర బీజేపీ యూనిట్లు కూడా బాలీవుడ్ సినిమాల పేర్లను అనుకరిస్తూ ‘చడ్ దే ఇండియా’, ‘లాపతా రాహుల్’ వంటి వ్యంగ్య పోస్టర్లను విడుదల చేసి రాహుల్ గాంధీ విదేశీ పర్యటనలపై సెటైర్లు వేశాయి.
కాంగ్రెస్ కౌంటర్
బీజేపీ ఆరోపణలను కాంగ్రెస్ పార్టీ తీవ్రంగా ఖండించింది. రాహుల్ గాంధీ విదేశీ పర్యటనలు వ్యక్తిగతమైనవి కాదని, ప్రపంచవ్యాప్తంగా ఉన్న విశ్వవిద్యాలయాలు, సంస్థలు, అంతర్జాతీయ వేదికల నుంచి వచ్చే ఆహ్వానాల మేరకే ఆయన విదేశాలకు వెళ్తున్నారని స్పష్టం చేసింది. కాంగ్రెస్ సీనియర్ నేత సల్మాన్ ఖుర్షీద్ మాట్లాడుతూ.. “రాహుల్ గాంధీ కేవలం భారత నాయకుడు మాత్రమే కాదు.. ప్రపంచవ్యాప్తంగా గుర్తింపు పొందిన నాయకుడు. అనేక దేశాల్లోని సంస్థలు, నాయకులు ఆయనను ఆహ్వానిస్తూ మాట్లాడాలని, చర్చించాలని కోరుకుంటుంటారు. అందుకే ఆయన రెండు, నాలుగు లేదా ఐదు రోజులపాటు మాత్రమే విదేశీ పర్యటనలు చేస్తుంటారు” అని చెప్పారు.
రాహుల్ గాంధీని అంతర్జాతీయ స్థాయిలో గుర్తింపు పొందిన నాయకుడిగా అభివర్ణించిన ఖుర్షీద్.. ఆయన విదేశీ పర్యటనలను రాజకీయ విమర్శలకు వాడుకోవడం సరికాదని బీజేపీపై మండిపడ్డారు. దీంతో రాహుల్ గాంధీ విదేశీ పర్యటనల అంశం మరోసారి అధికార, ప్రతిపక్షాల మధ్య రాజకీయ దుమారం రేపుతోంది.
चुनाव आते ही देश में…
हार मिलते ही विदेश की उड़ान भरना,
यही है राहुल गांधी की असली पहचान!देश की राजनीति में सवाल सिर्फ चुनाव जीतने-हारने का नहीं, बल्कि जिम्मेदारी निभाने का भी होता है।
लेकिन राहुल गांधी की राजनीति सिर्फ चुनाव जीतने और हारने तक ही सीमित है, इनको देश की जनता… pic.twitter.com/AzzM9YWnvG
— BJP (@BJP4India) June 25, 2026