Ketan Agarwal Case: కేతన్ అగర్వాల్ హత్య దేశంలో సంచలనంగా మారింది. పెళ్లి చేసుకోబోతున్న అమ్మాయి సియా గోయల్ అత్యంత దారుణంగా కుట్ర పన్ని హత్య చేసింది. ఈ కేసులో కొత్త విషయాలు వెలుగులోకి వస్తున్నాయి. ఇప్పటికే సియా, ఆమె ప్రియుడు చేతన్ను పోలీసులు అరెస్ట్ చేశారు. పథకం ప్రకారం, తన పుట్టిన రోజు అని చెప్పి లోహగఢ్ కోటకు తీసుకెళ్లి అక్కడి నుంచి తోసేసింది. దీనిపై కేతన్ తండ్రి మాట్లాడుతూ.. తన కొడుకును సియానే బలవంతంగా కోటకు తీసుకెళ్లిందని, ఒక వేళ వెళ్లకపోతే తన కొడుకు బ్రతికుండే వాడని కన్నీరు పెట్టుకున్నారు.
జూన్ 18న ఉదయం సుమారు 8.20 గంటలకు ,ఇద్దరూ లోహగఢ్ కోటకు బయలుదేరారు. ఉదయం 10.45 గంటలకు సియా తల్లి ఫోన్ చేసి, కేతన్ లోయలో పడిపోయారని చెప్పింది. కుటుంబ సభ్యులు అక్కడికి చేరుకునే లోపే కేతన్ మరణించారు. కేతన్ మృతదేహాన్ని ఇంటికి తీసుకుని వచ్చినప్పుడు సియాలో ఎలాంటి బాధ, దు:ఖం కనిపించలేదని అతని తండ్రి ఆరోపించారు. ఆమె ప్రవర్తనతో కుటుంబ సభ్యులకు అనుమానం కలిగింది. ఈ ఘటనకు ముందు జూన్ 14న సియా కేతన్ లోహ్గఢ్ కోటను సందర్శించారు. ఆ సమయంలో సియా కేతన్ను లోయలో పడేయడానికి ప్రయత్నించిందని తండ్రి ఆరోపించారు. అయితే ,కేతన్ చేయి పొదల్లో చిక్కుకోవడంతో ప్రాణాలతో బయటపడ్డాడు. వరస సంఘటనల తర్వాత కుటుంబ సభ్యుల్లో అనుమానం పెరిగింది.
కేతన్ తండ్రి చెబుతున్న దాని ప్రకారం, తనను ఉద్దేశపూర్వకంగానే తోసినట్లు కేతన్ సియాను అనుమానించాడు. కానీ సియా వెంటనే తేరుకుని పాము..పాము అంటూ అరవడం మొదలుపెట్టింది, అతడిని కాపాడేందుకే తోసినట్లు నమ్మించే ప్రయత్నం చేసింది. దీంతో ఆమె నటనను కేతన్ పూర్తిగా అర్థం చేసుకోలేకపోయాడు. జూన్ 14 ప్రయత్నం విఫలమైన తర్వాత జూన్ 18న తిరిగి అదే కోట పై నుంచి తోసేసి చంపింది.