LK Advani: మెరుగుపడిన ఆరోగ్యం.. ఢిల్లీ ఆసుపత్రి నుంచి ఎల్‌కే అద్వానీ డిశ్చార్జ్

LK Advani: భారతీయ జనతా పార్టీ (బీజేపీ) సీనియర్ నేత, మాజీ ఉప ప్రధాని లాల్ కృష్ణ అద్వానీ ఆరోగ్యం మెరుగుపడటంతో ఢిల్లీలోని ఆసుపత్రి నుంచి డిశ్చార్జ్ అయ్యారు. ఛాతీలో ఇన్ఫెక్షన్ కారణంగా అక్టోబర్ 16న ఆయనను ఆసుపత్రిలో చేర్చగా, చికిత్స అనంతరం ఆరోగ్యం మెరుగుపడటంతో సోమవారం వైద్యులు ఇంటికి పంపించారు. ప్రస్తుతం వయస్సు 98 సంవత్సరాలు. అద్వానీ న్యూఢిల్లీలోని ఇంద్రప్రస్థ అపోలో ఆసుపత్రిలో చికిత్స పొందారు. సీనియర్ కన్సల్టెంట్ న్యూరాలజీ వైద్యుడు డాక్టర్ వినీత్ సూరి పర్యవేక్షణలో వైద్య సేవలు అందించారు. అద్వానీ ఆరోగ్య పరిస్థితి మెరుగుపడినట్లు ఆసుపత్రి ఒక ప్రకటనలో వెల్లడించింది. అక్టోబర్ 16న ఛాతీలో ఇన్ఫెక్షన్‌తో ఆసుపత్రిలో చేరిన ఆయనను, వైద్య పరిస్థితిలో మెరుగుదల కనిపించడంతో డిశ్చార్జ్ చేస్తున్నట్లు తెలిపింది.

భారత రాజకీయాల్లో అద్వానీ కీలక పాత్ర

లాల్ కృష్ణ అద్వానీ భారత రాజకీయాల్లో సుదీర్ఘ అనుభవం కలిగిన నాయకుల్లో ఒకరు. అటల్ బిహారీ వాజ్‌పేయి ప్రధానమంత్రిగా ఉన్న సమయంలో 1999 నుంచి 2004 వరకు కేంద్ర హోంమంత్రిగా పనిచేశారు. 2002 నుంచి 2004 వరకు ఉప ప్రధానమంత్రి బాధ్యతలు నిర్వహించారు. 1927 నవంబర్ 8న అప్పటి బ్రిటిష్ భారతదేశంలోని కరాచీలో (ప్రస్తుతం పాకిస్థాన్‌లో ఉంది) జన్మించిన అద్వానీ, 1942లో రాష్ట్రీయ స్వయంసేవక్ సంఘ్ (ఆర్‌ఎస్‌ఎస్‌)లో స్వయంసేవక్‌గా చేరారు. అనంతరం భారత రాజకీయాల్లో ప్రముఖ పాత్ర పోషించారు.