Janjatiya Gaurav Diwas: గిరిజనుల సంక్షేమం, హక్కుల విషయంలో గత ప్రభుత్వాలపై ప్రధాని నరేంద్ర మోడీ విమర్శలు గుప్పించారు. తమ ప్రభుత్వం గిరిజనులకు హక్కులు కల్పించడంతో పాటు విద్య, ఆరోగ్యం, గృహాలు, ఉపాధి వంటి ప్రాథమిక సదుపాయాలను అందించేందుకు కృషి చేసిందని తెలిపారు. ప్రధాని నరేంద్ర మోడీ ఆదివారం జన్‌జాతీయ గౌరవ్ దివస్ కార్యక్రమంలో పాల్గొని గిరిజన సమాజాల అభివృద్ధిపై కీలక వ్యాఖ్యలు చేశారు. గత ప్రభుత్వాలు గిరిజనుల సమస్యలను సరిగా అర్థం చేసుకోలేదని, వారి సంక్షేమాన్ని కూడా తగిన స్థాయిలో పట్టించుకోలేదని విమర్శించారు.
మహారాష్ట్రలోని గడ్చిరోలిలో నిర్వహించిన కార్యక్రమంలో దేశవ్యాప్తంగా ఉన్న గిరిజన వర్గాల సభ్యులతో ప్రధాని మోడీ వర్చువల్‌గా మాట్లాడారు. గిరిజన స్వాతంత్ర్య సమరయోధుడు బిర్సా ముండా 151వ జయంతి సందర్భంగా ఈ కార్యక్రమాన్ని నిర్వహించారు. ఈ సందర్భంగా వివిధ ప్రభుత్వ పథకాల లబ్ధిదారులు తమ అనుభవాలను ప్రధాని మోడీతో పంచుకున్నారు. ప్రభుత్వ పథకాల ద్వారా తమ జీవితాల్లో వచ్చిన మార్పులను వివరించారు.
గుజరాత్‌లోని భరూచ్ జిల్లాకు చెందిన నేట్రాంగ్ తాలూకాలోని హతకుండి గ్రామానికి చెందిన వజీర్‌తో ప్రధాని మోడీ మాట్లాడారు. న్యూ గుజరాత్ ప్యాటర్న్ యోజన ద్వారా వెదురుతో ఉత్పత్తులు తయారు చేసే విషయంలో శిక్షణ పొందినట్లు వజీర్ తెలిపారు. 2004లో ఈ శిక్షణ తీసుకున్నానని, అనంతరం పీఎం-జన్‌మన్ పథకంలోని పలు కార్యక్రమాల ద్వారా ప్రయోజనం పొందానని ప్రధానికి వివరించారు. ఈ సందర్భంగా ప్రధాని మోడీ బ్రిటిష్ పాలన కాలంలో వెదురును చెట్టుగా పరిగణిస్తూ అమలు చేసిన నిబంధనలను ప్రస్తావించారు. బ్రిటిష్ పాలకులు వెదురును ‘చెట్టు’గా వర్గీకరించారని, దానిని నరికితే జైలుకు పంపే పరిస్థితి ఉండేదని ప్రధాని పేర్కొన్నారు.
స్వాతంత్ర్యం వచ్చిన తర్వాతే ఆ నిబంధనలను తొలగించాల్సి ఉండేదని, అయితే గత ప్రభుత్వాల్లో ఉన్న కొందరు గిరిజనుల సమస్యలను అర్థం చేసుకోలేదని, వారి సంక్షేమాన్ని కూడా పట్టించుకోలేదని మోడీ విమర్శించారు. తమ ప్రభుత్వం అధికారంలోకి వచ్చిన తర్వాత ఆ చట్టపరమైన అడ్డంకులను తొలగించి వెదురుపై గిరిజనులకు పూర్తి హక్కులు కల్పించిందని తెలిపారు.
మహారాష్ట్రలోని యవత్మాల్ జిల్లాకు చెందిన పీఎం-జన్‌మన్ పథకం లబ్ధిదారు కృష్ణ నాగోరావు టేకా కూడా ప్రధాని మోడీతో మాట్లాడారు. ప్రభుత్వ సహాయం అందకముందు తమ కుటుంబం ఎన్నో ఇబ్బందులు ఎదుర్కొందని ఆయన తెలిపారు. ముఖ్యంగా వర్షాకాలంలో ఇంట్లో నివసించడం చాలా కష్టంగా ఉండేదని, ఇతర సమస్యలతో ఇబ్బందులు పడేవాళ్లమని చెప్పారు. అయితే పీఎం-జన్‌మన్ పథకం కింద తమ కుటుంబానికి పక్కా ఇల్లు, మరుగుదొడ్డి, ఇతర ప్రాథమిక సదుపాయాలు అందాయని తెలిపారు. ఈ సౌకర్యాల వల్ల తమ జీవితంలో పెద్ద మార్పు వచ్చిందని ప్రధాని మోడీకి కృతజ్ఞతలు తెలిపారు.
దీనిపై స్పందించిన ప్రధాని, పీఎం-జన్‌మన్ మిషన్ ద్వారా గిరిజన కుటుంబాల జీవితాల్లో మార్పు రావడం సంతోషకరమని అన్నారు. అభివృద్ధి గ్రామాలకు చేరుకోవడంతో పాటు గిరిజన సమాజాలు తమ సాంస్కృతిక వారసత్వంతో అనుబంధాన్ని కొనసాగించాల్సిన అవసరం ఉందని పేర్కొన్నారు.
హైదరాబాద్ విద్యార్థితో ప్రధాని మోడీ సంభాషణ
హైదరాబాద్‌కు చెందిన సబావత్ అన్వేష్ అనే విద్యార్థి కూడా ఈ కార్యక్రమంలో ప్రధాని మోడీతో మాట్లాడారు. పీఎం శ్రీ స్కూల్స్ (PM SHRI Schools) కార్యక్రమాన్ని తీసుకురావడం ద్వారా విద్యార్థులకు ఉన్నత విద్యలో ముందుకు వెళ్లేందుకు అవకాశాలు పెరుగుతున్నాయని ఆయన తెలిపారు. పీఎం శ్రీ అంటే ప్రధాన్ మంత్రి స్కూల్స్ ఫర్ రైజింగ్ ఇండియా కార్యక్రమం. ఈ పథకం విద్యా రంగంలో మౌలిక సదుపాయాలు, నాణ్యమైన విద్యను మెరుగుపరచడంపై దృష్టి సారిస్తోంది.
రూ.3,000 కోట్ల అభివృద్ధి ప్రాజెక్టులకు శ్రీకారం
జన్‌జాతీయ గౌరవ్ దివస్ సందర్భంగా ప్రధాని మోడీ సుమారు రూ.3,000 కోట్ల విలువైన 246 అభివృద్ధి ప్రాజెక్టులను ప్రారంభించారు. ఈ ప్రాజెక్టుల ద్వారా గిరిజన సమాజాలకు సంబంధించి విద్య, ఆరోగ్యం, జీవనోపాధి అవకాశాలు, సామాజిక మౌలిక సదుపాయాలను బలోపేతం చేయాలని లక్ష్యంగా పెట్టుకున్నారు. మొత్తం ప్రాజెక్టుల్లో ప్రధాని మోడీ 173 కార్యక్రమాలను ప్రారంభించారు. వాటిలో ముఖ్యమైనవి:
గిరిజన విద్యార్థుల కోసం 38 ఏకలవ్య మోడల్ రెసిడెన్షియల్ స్కూల్స్ (EMRS)
పీఎం-జన్‌మన్ కింద 100 మల్టీ పర్పస్ సెంటర్లు
పీఎం-జన్‌మన్, ధర్తీ ఆబా జన్‌జాతీయ గ్రామ ఉత్కర్ష్ అభియాన్ కింద ఇతర అభివృద్ధి కార్యక్రమాలు
గిరిజన సంస్కృతి, చరిత్ర పరిరక్షణకు ప్రాధాన్యం
అరుణాచల్ ప్రదేశ్ రాజధాని ఇటానగర్‌లో ట్రైబల్ రీసెర్చ్ ఇన్‌స్టిట్యూట్ భవనంను కూడా ప్రారంభించారు.
అదేవిధంగా మిజోరంలోని ఐజ్వాల్‌లో రోపుయిలియాని ట్రైబల్ ఫ్రీడమ్ ఫైటర్ మ్యూజియంను ప్రారంభించారు.
ఈ ప్రాజెక్టుల ప్రధాన ఉద్దేశం గిరిజన సంస్కృతి, చరిత్ర, వారసత్వాన్ని పరిరక్షించడం.
కొత్త ఏకలవ్య పాఠశాలలు, మార్కెటింగ్ కేంద్రాలు
గిరిజన పిల్లలకు నాణ్యమైన విద్యను మరింత విస్తరించేందుకు 19 కొత్త ఏకలవ్య మోడల్ రెసిడెన్షియల్ స్కూల్స్కు ప్రధాని శంకుస్థాపన చేశారు.
అలాగే గిరిజన ఉత్పత్తిదారులకు మార్కెట్ అవకాశాలు పెంచేందుకు 12 ట్రైబల్ మల్టీ పర్పస్ మార్కెటింగ్ సెంటర్లకు (TMMCలు) కూడా శంకుస్థాపన చేశారు.
ఇవే కాకుండా పీఎం-జన్‌మన్, ధర్తీ ఆబా జన్‌జాతీయ గ్రామ ఉత్కర్ష్ అభియాన్ కింద మరో 42 ప్రాజెక్టులు కూడా శంకుస్థాపన కార్యక్రమంలో భాగమయ్యాయి.
దేశవ్యాప్తంగా నవంబర్ 1 నుంచి 15 వరకు నిర్వహించిన జన్‌జాతీయ గౌరవ్ పఖ్వాడా ముగింపు సందర్భంగా ఈ కార్యక్రమం జరిగింది. భారత చరిత్రలో గిరిజన సమాజాల పాత్రను గుర్తించడం, వారి స్వాతంత్ర్య పోరాటాలను స్మరించుకోవడం, గిరిజనుల అభివృద్ధి కోసం అమలు చేస్తున్న ప్రభుత్వ కార్యక్రమాలను ప్రజలకు వివరించడం ఈ కార్యక్రమం ప్రధాన ఉద్దేశంగా నిలిచింది.