Ravi Kishan: డానిష్ అలీపై చర్య తీసుకోవాలి..స్పీకర్ని కోరిన రేసుగుర్రం విలన్..

Ravi Kishan: బీజేపీ ఎంపీ నటుడు రవికిషన్ అన్‌పార్లమెంటరీ చట్టాన్ని పరిశీలించాలని డానిష్ అలీపై చర్య తీసుకోవాలని లోక్‌సభ స్పీకర్ కి లేఖ రాశారు. బీఎస్పీ ఎంపీ డానిష్ అలీపై బీజేపీ ఎంపీ రమేష్ బిధూరి విద్వేషపూరిత వ్యాఖ్యలు చేశారనే వివాదం కొనసాగుతోంది. మతప్రాతిపదికన బిధూరి, డానిష్ అలీపై వ్యాఖ్యానించాడు. ఈ వివాదం బీజేపీ వర్సెస్ ప్రతిపక్షాలుగా మారింది. చంద్రయాన్ -3 చర్చ సందర్భంగా రమేష్ బిధూరి అతనిపై పార్లమెంట్ లో విద్వేషపూరిత వ్యాఖ్యలు చేశాడని ఆరోపణలు వెల్లువెత్తుతున్నాయి.

ఈ వ్యవహారంపై బీజేపీ ఎంపీలు కూడా తగ్గడం లేదు. ఇప్పటికే బిధూరితో పాటు మరో ఎంపీ నిషికాంత్ దూబే, డానిష్ అలీ వ్యవహారాన్ని తప్పుపట్టాడు. గోరఖ్ పూర్ బీజేపీ ఎంపీ రవికిషన్ కూడా ఈ వ్యవహారంలో కీలక వ్యాఖ్యలు చేశారు. ‘‘ డిసెంబర్ 9, 2022న నేను జనాభా నియంత్రణపై ప్రైవేట్ బిల్లు ప్రవేశపెడుతున్న సమయంలో బీఎస్పీ ఎంపీ కున్వర్ డానిష్ అలీ అన్‌పార్లమెంటరీ చర్యలు, పదాలు వినియోగించడాన్ని పరిశీలించాలి అని నేను మిమ్మల్ని కోరుతున్నాను’’ అంటూ లోక్ సభ స్పీకర్ ఓం బిర్లాకు రవికిషన్ లేఖ రాశారు.

Read Also: Himanta Biswa Sharma: నా ముందు నిలబడే ధైర్యం రాహుల్ గాంధీకి లేదు.. అస్సాం సీఎం కీలక వ్యాఖ్యలు

పార్లమెంట్లో రమేష్ బిధూరి మాట్లాడుతున్న సమయంలో బీఎస్పీ ఎంపీ నిరంతరం రన్నింగ్ కామెంట్రీ చేయడంతో పాటు అభ్యంతరకర పదాలను ఉపయోగించాడని రవి కిషన్ తన లేఖలో పేర్కొన్నాడు. అయితే రమేష్ బిధూరి చేసిన వ్యాఖ్యలు సరికాదని, దేవాలయం లాంటి పార్లమెంట్ లో అలా మాట్లాడటం ఆమోదయోగ్యం కాదని అయితే డానిష్ అలీ చేసిన ఇలాంటి వ్యాఖ్యలే బిధూరి అలా మాట్లాడటానికి కారణమయ్యాయని, వీటిని మరోసారి పరిశీలించాల్సిన అవసరం ఉందని లేఖలో పేర్కొన్నారు.

అంతకుముందు బీజేపీ ఐటీ సెల్ హెడ్ అమిత్ మాల్వియా కూడా లోక్ సభలో ప్రధాని నరేంద్రమోడీకి వ్యతిరేఖంగా మతమపరమైన దూషణలు, వివాదాస్పద వ్యాఖ్యలను డానిష్ అలీ చేయడం వల్లే బిధూరి స్పందించాల్సి వచ్చిందని ఆరోపించారు. బీఎస్పీ ఎంపీ ప్రధానిని ‘నీచ్’ అని పిలిచారని, అందుకే బిధూరి ఆగ్రహంతో సమాధానం చెప్పారని మాల్వియా అన్నారు. రమేష్ బిధూరి వ్యాఖ్యలకు కేంద్ర రక్షణ మంత్రి రాజ్ నాథ్ సింగ్ క్షమాపణలు చెప్పారు. అయినా ఇది రాజకీయంగా వివాదాస్పదం అయింది. ఇప్పటికే బిధూరిపై చర్యలు తీసుకోవాలని డానిష్ అలీ స్పీకరి కి లేఖ రాశారు. మరోవైపు బీజేపీ కూడా బిధూరికి షోకాజ్ నోటీసులు జారీ చేసింది.