School Holidays: కుక్కల బెడదతో స్కూళ్లకు సెలవులు.. 4 రోజులు ఆన్‌లైన్ క్లాసులే..

School Holidays: కుక్కల బెడద రోజురోజుకూ ఎక్కువ అవుతోంది.. కొన్ని ప్రాంతాల్లో ఇంట్లో నుంచి బయటకు అడుగు పెట్టాలన్నా.. లేదా ఏదైనా కొత్త ఏరియాకు వెళ్లినా.. కుక్కలను చూసి భయపడాల్సిన పరిస్థితి.. అయితే, కుక్కుల భయంతో 10 స్కూల్స్‌కు సెలవులు ఇవ్వడం సంచలనంగా మారంది.. ఉత్తరాఖండ్‌లోని చమోలీ జిల్లా నారాయణబగడ్ ప్రాంతంలో వీధి కుక్కలు, హింసాత్మక కుక్కల బెడద పెరగడంతో అధికారులు కీలక నిర్ణయం తీసుకున్నారు. విద్యార్థుల భద్రతను దృష్టిలో ఉంచుకుని ఆ ప్రాంతంలోని 10 పాఠశాలలను నాలుగు రోజుల పాటు మూసివేయాలని నిర్ణయించారు.

ఆగస్టు 20 నుంచి 23 వరకు పాఠశాలలకు సెలవులు
చమోలీ ముఖ్య విద్యాధికారి ఆకాష్ సరస్వత్ జారీ చేసిన ఉత్తర్వుల ప్రకారం.. నారాయణబగడ్ ప్రాంతంలోని 10 పాఠశాలలకు ఆగస్టు 20, 2026 నుంచి ఆగస్టు 23, 2026 వరకు సెలవులు ప్రకటించారు. ఈ కాలంలో విద్యార్థులను పాఠశాలలకు రప్పించకుండా చూడాలని ఆదేశించారు. అయితే, పాఠశాలలు మూసివేసినప్పటికీ విద్యార్థుల చదువుకు అంతరాయం కలగకుండా అధికారులు ప్రత్యామ్నాయ ఏర్పాట్లు చేశారు. నాలుగు రోజుల పాటు విద్యార్థులకు ఆన్‌లైన్ తరగతులు నిర్వహించాలని నిర్ణయించారు. దీంతో ఒకవైపు పిల్లల భద్రతను కాపాడుతూనే, మరోవైపు వారి విద్య కొనసాగించేలా చర్యలు చేపట్టారు.

జిల్లా మేజిస్ట్రేట్ ఆదేశాలతో నిర్ణయం
నారాయణబగడ్ ప్రాంతంలో కుక్కల బెడద పెరుగుతున్న నేపథ్యంలో స్థానిక ఏరియా పంచాయతీ అధిపతి అధికారులకు లేఖ రాశారు. ఈ విషయాన్ని జిల్లా మేజిస్ట్రేట్ దృష్టికి తీసుకెళ్లడంతో, ఆయన ఆదేశాల మేరకు పాఠశాలలను తాత్కాలికంగా మూసివేయాలని విద్యాశాఖ నిర్ణయించింది. అయితే, వీధి కుక్కలు, హింసాత్మక కుక్కల కారణంగా విద్యార్థులకు ఎలాంటి ప్రమాదం జరగకుండా ముందస్తు చర్యల్లో భాగంగానే పాఠశాలలను మూసివేసినట్లు అధికారులు తెలిపారు. ప్రస్తుతం ఈ ఉత్తర్వులు నారాయణబగడ్ ప్రాంతంలోని 10 పాఠశాలలకు వర్తించనున్నాయి. మొత్తంగా కుక్కల సమస్య నియంత్రణలోకి వచ్చిన తర్వాత పాఠశాలలను సాధారణంగా నిర్వహించే అవకాశం ఉంది. అప్పటివరకు విద్యార్థులు ఆన్‌లైన్ తరగతుల ద్వారా విద్యను కొనసాగించనున్నారు.