ఇండియా కూటమిలో భాగమైన కాంగ్రెస్, ఆప్.. ఢిల్లీ అసెంబ్లీ ఎన్నికల్లో ప్రత్యర్థులుగా మారి ఢీకొంటున్నాయి. ఇప్పటికే రెండు పార్టీలు ఒకరిపై ఒకరు తీవ్ర విమర్శలు చేసుకుంటున్నాయి. తాజాగా మరోసారి మాజీ ముఖ్యమంత్రి, ఆప్ అధినేత కేజ్రీవాల్.. కాంగ్రెస్ టార్గెట్‌గా తీవ్ర ఆరోపణలు చేశారు. బీజేపీని గెలిపించేందుకే ఢిల్లీ అసెంబ్లీ ఎన్నికల్లో కాంగ్రెస్ పోటీ చేస్తోందని వ్యాఖ్యానించారు.
కాంగ్రెస్ మద్దతుదారులను ఉద్దేశించి కేజ్రీవాల్ వీడియో సందేశంలో హస్తం పార్టీపై ఆరోపణలు చేశారు. ఎన్నికల ప్రచారం ముగింపు దశకు వచ్చినా.. ఆ పార్టీ నేతలు బీజేపీకి వ్యతిరేకంగా ఒక్క మాట కూడా మాట్లాడడం లేదని ధ్వజమెత్తారు. అంటే బీజేపీని గెలిపించేందుకే కాంగ్రెస్ నేతలు పని చేస్తున్నారని ఆరోపించారు. కాంగ్రెస్ మద్దతుదారులతో ఒకటే చెప్పానని.. ‘‘కాంగ్రెస్‌కు ఓటు వేస్తే.. బీజేపీ అధికారంలోకి వస్తుంది. అదే జరిగితే పాఠశాలలు నాశనమవుతాయి. ఉచిత కరెంట్‌, నీళ్లు, మొహల్లా క్లినిక్‌లు, మహిళలకు ఉచిత బస్సు ఇలా అన్నీ ఆగిపోతాయి. ఒక కుటుంబం నెలకు రూ.25 వేలు నష్టపోవాల్సి వస్తుందని చెప్పాను. వాళ్లంతా ఏకీభవించారు. చీపురు గుర్తుకే ఓటు వేస్తామని చెప్పారు’’ అని కేజ్రీవాల్ వీడియోలో వివరించారు.
ఢిల్లీలో మొత్తం 70 అసెంబ్లీ స్థానాలు ఉన్నాయి. ఫిబ్రవరి 5న ఎన్నికల పోలింగ్ జరగనుంది. ఎన్నికల ఫలితాలు మాత్రం ఫిబ్రవరి 8న విడుదల కానున్నాయి. ఆప్, బీజేపీ, కాంగ్రెస్ మధ్య పోటీ నెలకొంది.