Vijay Deverakonda : నాగ చైతన్య ‘దూత’ డైరెక్టర్ తో విజయ్ దేవరకొండ… క్రేజీ కాంబినేషన్ లోడింగ్ ?

Vijay Deverakonda : విజయ్ దేవరకొండ కెరీర్‌లో ప్రస్తుతం ఆసక్తికరమైన పరిణామాలు చోటుచేసుకుంటున్నాయి. ఒకవైపు భారీ బడ్జెట్ పాన్ ఇండియా చిత్రాలతో ప్రేక్షకుల ముందుకు రావడానికి సిద్ధమవుతుండగా, మరోవైపు కొత్త దర్శకులతో కలిసి పనిచేయనున్నారనే వార్తలు చక్కర్లు కొడుతున్నాయి. తాజాగా వినిపిస్తున్న కథనాల ప్రకారం, విజయ్ దేవరకొండ మరోసారి తన కెరీర్‌లో కొత్త మలుపు తిప్పే ప్రయత్నంలో ఉన్నట్లు కనిపిస్తోంది. ముఖ్యంగా సైన్స్ ఫిక్షన్, థ్రిల్లర్ కథలతో ప్రత్యేక గుర్తింపు తెచ్చుకున్న దర్శకుడు విక్రమ్ కుమార్‌తో ఆయన జతకట్టనున్నారనే వార్త ఆసక్తిగా మారింది.

ప్రస్తుతం విజయ్ దేవరకొండ చేతిలో ఇప్పటికే పలు కీలక ప్రాజెక్టులు ఉన్నాయి. అయినప్పటికీ కొత్త కథల కోసం ఆయన వెతుకుతున్న తీరు, తన కెరీర్‌ను విభిన్న దిశల్లో తీసుకెళ్లాలనే ప్రయత్నాన్ని స్పష్టంగా చూపిస్తోంది. సినీ వర్గాల్లో వినిపిస్తున్న సమాచారం ప్రకారం, ‘24’ వంటి విభిన్న కాన్సెప్ట్ చిత్రాన్ని తెరకెక్కించిన విక్రమ్ కుమార్‌తో విజయ్ ఒక కొత్త ప్రాజెక్ట్‌పై చర్చలు జరుపుతున్నట్లు తెలుస్తోంది. ఈ చిత్రాన్ని ప్రముఖ నిర్మాణ సంస్థ మ్యాడాక్ ఫిల్మ్స్ నిర్మించే అవకాశాలు ఉన్నాయని ప్రచారం జరుగుతోంది. అంతేకాదు, ఈ సినిమా పాన్ ఇండియా స్థాయిలో రూపొందే అవకాశాలు ఉన్నాయని కూడా చెబుతున్నారు. అయితే ఇప్పటివరకు ఈ విషయంపై అధికారిక ప్రకటన రాలేదు.

ఇదిలా ఉండగా, విక్రమ్ కుమార్ ప్రస్తుతం తన సూపర్ హిట్ వెబ్ సిరీస్ ‘ధూత’ రెండో సీజన్ పనుల్లో బిజీగా ఉన్నారు. నాగ చైతన్య ప్రధాన పాత్రలో తెరకెక్కిన ఈ సిరీస్ తొలి సీజన్ ప్రేక్షకులను ఉత్కంఠభరితమైన కథతో ఆకట్టుకుంది. జర్నలిస్ట్ సాగర్ జీవితంలో చోటుచేసుకునే అతీంద్రియ సంఘటనల చుట్టూ తిరిగిన ఈ కథకు మంచి స్పందన లభించింది. ఇప్పుడు రెండో సీజన్ మరింత సస్పెన్స్ కథనంతో రాబోతుందని తెలుస్తోంది. ఇందులో నాగ చైతన్యతో పాటు పార్వతి తిరువోతు, ప్రియా భవానీ శంకర్ కూడా తిరిగి కనిపించనున్నారు.

మరోవైపు విజయ్ దేవరకొండ తన భారీ పీరియడ్ యాక్షన్ డ్రామా ‘రణబలి’పై దృష్టి పెట్టారు. రాహుల్ సంకృత్యాన్ దర్శకత్వంలో తెరకెక్కుతున్న ఈ చిత్రంలో రష్మిక మందన్న కథానాయికగా నటిస్తోంది. బ్రిటిష్ పాలనకు వ్యతిరేకంగా పోరాడే ధైర్యవంతుడైన యోధుడి కథగా ఈ సినిమా రూపొందుతోంది. భారీ స్థాయిలో తెరకెక్కుతున్న ఈ చిత్రం 2026 సెప్టెంబర్ 11న విడుదల కానుంది. విజయ్ కెరీర్‌లో అత్యంత ప్రతిష్ఠాత్మక ప్రాజెక్టులలో ఇది ఒకటిగా భావిస్తున్నారు.

అదే సమయంలో రవి కిరణ్ కోల దర్శకత్వంలో తెరకెక్కుతున్న ‘రౌడీ జనార్దన’ కూడా భిన్నమైన కాన్సెప్ట్ తో రాబోతోంది. ఈ యాక్షన్ డ్రామాలో కీర్తి సురేష్ కథానాయికగా నటిస్తోంది. అలాగే ‘హాయ్ నాన్న’ దర్శకుడు శౌర్యువ్‌తో మరో కొత్త ప్రాజెక్ట్‌ను కూడా విజయ్ ఇప్పటికే ప్రకటించారు. దీంతో విజయ్ దేవరకొండ రాబోయే సంవత్సరాల్లో వరుసగా విభిన్న జానర్లలో ప్రేక్షకులను అలరించేందుకు సిద్ధమవుతున్నట్లు కనిపిస్తోంది.