Vijay Antony: విజయ్ ఆంటోనీ బర్త్‌డే స్పెషల్.. ‘వంద దేవుళ్లు’ ఓటీటీ రిలీజ్‌కు రెడీ!

Vijay Antony: ప్రముఖ హీరో విజయ్ ఆంటోనీ పుట్టినరోజు సందర్భంగా ఆయన నటించిన తాజా ఫ్యామిలీ ఎంటర్‌టైనర్ ‘వంద దేవుళ్లు’ ఓటీటీ రిలీజ్‌పై అధికారిక ప్రకటన వచ్చింది. ప్రముఖ డిజిటల్ ప్లాట్‌ఫామ్ ZEE5 తెలుగు ఈ చిత్రాన్ని ఆగస్టులో స్ట్రీమింగ్ చేయనున్నట్లు వెల్లడించింది. అయితే సినిమా స్ట్రీమింగ్ తేదీని త్వరలో ప్రకటించనున్నారు. ఇటీవల ‘పరిమళ & కో’ చిత్రంతో ఫ్యామిలీ ఆడియెన్స్‌ను ఆకట్టుకున్న ZEE5 తెలుగు.. ఇప్పుడు మరో హృద్యమైన కుటుంబ కథా చిత్రంతో ప్రేక్షకుల ముందుకు వస్తోంది. విజయ్ ఆంటోనీ నటించిన ‘వంద దేవుళ్లు’ కూడా అన్ని వర్గాల ప్రేక్షకులను ఆకట్టుకునే ఫ్యామిలీ ఎంటర్‌టైనర్‌గా నిలవనుందని మేకర్స్ తెలిపారు.

నిజ జీవిత సంఘటనల ఆధారంగా తెరకెక్కిన ఈ సినిమా ఓ తల్లి, ఆమె ఇద్దరు కొడుకుల చుట్టూ సాగుతుంది. నలభై ఏళ్లు దాటిన ఓ తల్లి తన జీవితంలో మరోసారి తోడు కోసం ఆలోచించినప్పుడు ఎదురయ్యే సామాజిక ఒత్తిళ్లు, కుటుంబ సమస్యలు, సమాజం నుంచి వచ్చే విమర్శలను ఈ చిత్రం చూపిస్తుంది. తల్లి జీవితంలోని త్యాగాలను గుర్తించిన కొడుకు.. ఆమె సంతోషం కోసం సమాజాన్ని ఎదుర్కొనే కథాంశమే ఈ సినిమాకు ప్రధాన ఆకర్షణగా నిలుస్తుంది. తల్లీకొడుకుల మధ్య ఉన్న అనుబంధాన్ని భావోద్వేగభరితంగా చూపించిన ఈ చిత్రం వివాహం, మాతృత్వం, మహిళల స్వతంత్ర నిర్ణయాలు వంటి అంశాలను ప్రస్తావిస్తుంది. థియేటర్లలోనూ మంచి స్పందన అందుకున్న ‘వంద దేవుళ్లు’లోని సహజమైన భావోద్వేగాలు, నటీనటుల అద్భుతమైన నటన ప్రేక్షకులను ఆకట్టుకున్నాయి. కుటుంబంతో కలిసి చూసేలా ఉండే ఈ చిత్రం అన్ని తరాల ప్రేక్షకులకు కనెక్ట్ అవుతుందని చిత్రబృందం భావిస్తోంది. ఈ సందర్భంగా ZEE5 మార్కెటింగ్ సౌత్, తమిళ & మలయాళం బిజినెస్ హెడ్ లాయిడ్ సి జేవియర్ మాట్లాడుతూ.. ‘‘పరిమళ & కో’కు వచ్చిన స్పందన ఫ్యామిలీ ఎంటర్‌టైనర్స్‌పై ప్రేక్షకుల ఆసక్తిని మరోసారి నిరూపించింది. ‘వంద దేవుళ్లు’తో అదే ప్రయాణాన్ని కొనసాగిస్తున్నాం. మంచి కథలను అన్ని భాషల ప్రేక్షకులకు అందించడమే మా లక్ష్యం’’ అని తెలిపారు. ‘వంద దేవుళ్లు’ ఈ ఆగస్టులో ప్రత్యేకంగా ZEE5లో తమిళం, తెలుగు, కన్నడ, మలయాళ భాషల్లో స్ట్రీమింగ్ కానుంది.