Venky Atluri: ‘‘ఫ్యామిలీ సినిమా వద్దన్నారు.. కానీ వంశీ గారు నన్ను నమ్మారు’’.. వెంకీ అట్లూరి ఎమోషనల్!

Venky Atluri: స్టార్ హీరో సూర్య హీరోగా వెంకీ అట్లూరి దర్శకత్వంలో తెరకెక్కిన ఫీల్‌గుడ్ ఫ్యామిలీ ఎంటర్‌టైనర్ ‘విశ్వనాథ్ అండ్ సన్స్’. ఈ చిత్రం ఆగస్టు 14న ప్రేక్షకుల ముందుకు వచ్చి సూపర్ హిట్ టాక్‌తో థియేటర్స్‌లో దూసుకుపోతుంది. ఈ క్రమంలో చిత్రబృందం తాజాగా సక్సెస్ మీట్ నిర్వహించింది. ఈ కార్యక్రమంలో డైరెక్టర్ వెంకీ అట్లూరి మాట్లాడుతూ.. సినిమాకు అండగా నిలిచిన ప్రేక్షకులు, నిర్మాతలు, నటీనటులు, టెక్నీషియన్లకు కృతజ్ఞతలు తెలిపారు. ప్రస్తుతం యాక్షన్, డార్క్ కామెడీ, హారర్, డివైన్ ఇంటర్వెన్షన్ వంటి జానర్లు ట్రెండ్ అవుతున్న సమయంలో తాను ఫ్యామిలీ సినిమాతో ప్రేక్షకుల ముందుకు రావాలని అనుకున్నట్లు తెలిపారు. అయితే ఈ నిర్ణయంపై కొందరు తనను నిరుత్సాహపరిచే ప్రయత్నం చేసినా.. నిర్మాత నాగవంశీ మాత్రం తనకు పూర్తి మద్దతు ఇచ్చారని చెప్పారు.

‘‘ఈ సబ్జెక్ట్‌ను మొదట రాసినప్పుడు ట్రెండ్ వేరేలా ఉంది. యాక్షన్, డార్క్ హ్యూమర్, హారర్ వంటి సినిమాలు ఎక్కువగా వస్తున్నాయి. అలాంటి సమయంలో ఫ్యామిలీ సినిమా చేద్దామని అనుకున్నప్పుడు చాలామంది డిస్కరేజ్ చేశారు. కానీ వంశీ గారు నన్ను డిస్కరేజ్ చేయలేదు. ఆయన సపోర్ట్ లేకపోతే ఈ సినిమా జరిగేది కాదు’’ అని వెంకీ అట్లూరి పేర్కొన్నారు. సినిమా విడుదలైన తర్వాత వస్తున్న స్పందనపై కూడా ఆయన ఆనందం వ్యక్తం చేశారు. ముఖ్యంగా బాక్సాఫీస్ వసూళ్లు రోజు రోజుకూ పెరుగుతున్నాయని, కొన్ని ప్రాంతాల్లో కలెక్షన్లు భారీగా జంప్ అవుతున్నాయని చెప్పారు. ‘‘30 శాతం, 40 శాతం జంప్స్ వింటుంటాం.. కానీ 100 శాతం జంప్ కావడం నేను తొలిసారి వింటున్నాను’’ అంటూ వెంకీ అట్లూరి హర్షం వ్యక్తం చేశారు. సినిమా సక్సెస్‌లో ప్రేక్షకుల పాత్ర ఎంతో కీలకమని ఆయన అన్నారు. ‘‘ఈ సినిమాను మీ భుజాలపై మోసుకుని తీసుకెళ్లారు. మీ ప్రేమ, ఆదరణకు ఎప్పటికీ కృతజ్ఞుడిని. నా కుటుంబానికి అన్నం పెట్టే స్థాయిలో నన్ను నిలబెట్టిన ప్రేక్షకులకు థాంక్యూ’’ అంటూ భావోద్వేగానికి గురయ్యారు. అలాగే హీరో సూర్య, మమితా బైజు, రాధిక శరత్‌కుమార్, రవీనా టాండన్, సునీల్, హర్ష, వెంకట్ మాస్టర్ తదితరుల సహకారాన్ని వెంకీ అట్లూరి ప్రత్యేకంగా గుర్తుచేసుకున్నారు. ముఖ్యంగా సూర్య నటన, రవీనా టాండన్ పాత్రకు ప్రేక్షకుల నుంచి వస్తున్న ప్రశంసలపై ఆనందం వ్యక్తం చేశారు.