Shivaji: పుష్పలో ‘మంగళం శ్రీను’ రోల్ నాదే.. సునీల్ కంటే ముందే ఆ ఛాన్స్ నాకే వచ్చింది!

Shivaji: టాలీవుడ్ సీనియర్ యాక్టర్, బిగ్‌బాస్ ఫేమ్ శివాజీ తాజాగా ‘తెల్ల కాగితం’ చిత్ర ట్రైలర్ లాంచ్ వేదికపై చేసిన కామెంట్స్ నెట్టింట వైరల్ అవుతున్నాయి. యంగ్ హీరో హర్ష్ రోషన్, నక్షత్ర జంటగా నటించిన ‘తెల్ల కాగితం’ చిత్ర ట్రైలర్ లాంచ్ వేడుకకు ముఖ్య అతిథిగా హాజరైన శివాజీ.. తన కెరీర్, ఇండస్ట్రీ సమీకరణాలపై ఓపెన్‌గా మాట్లాడారు. ఈ క్రమంలోనే ఐకాన్ స్టార్ అల్లు అర్జున్ – సుకుమార్ కాంబినేషన్‌లో వచ్చిన ఇండస్ట్రీ హిట్ ‘పుష్ప’ చిత్రంలోని కీలక పాత్ర గురించి సంచలన విషయాన్ని బయటపెట్టారు. సినిమా ఇండస్ట్రీలో ఎవరికి ఏ పాత్ర రాసిపెట్టి ఉంటే వాళ్లకే దక్కుతుందని చెబుతూ ‘పుష్ప’ ప్రస్తావన తెచ్చారు శివాజీ. “మనం ఎంత అనుకున్నా విధి నిర్ణయం మరొకటి ఉంటుంది. నిజం మాట్లాడాలంటే సుకుమార్ గారి ‘పుష్ప’లో ‘మంగళం శ్రీను’ పాత్రను ఫస్ట్ నేనే చేయాల్సింది. కానీ అది సునీల్ ఖాతాలోకి వెళ్లాలని రాసిపెట్టి ఉంది, కాబట్టే అతడికి వెళ్లింది. ఆ క్యారెక్టర్‌ను సునీల్ అద్భుతంగా పండించి విజయం సాధించాడు” అంటూ మంగళం శ్రీను పాత్ర వెనుక ఉన్న అసలు నిజాన్ని పంచుకున్నారు.

ఈ సందర్భంగా ‘తెల్ల కాగితం’ సినిమాతో తనకున్న అనుబంధాన్ని శివాజీ గుర్తుచేసుకున్నారు. రీ-ఎంట్రీలో సినిమాలు చేయాలనుకున్న సమయంలో మొదట తన వద్దకు వచ్చిన ప్రాజెక్టుల్లో ఇదొకటని వెల్లడించారు. ఈటీవీ సాయికృష్ణ ద్వారా రాజమండ్రి నేపథ్యంలో సాగే ఈ స్వచ్ఛమైన ప్రేమకథ తన వద్దకు వచ్చిందని, వినగానే కథ విపరీతంగా నచ్చడంతో తానే స్వయంగా నిర్మించాలని కూడా భావించినట్లు చెప్పారు. అయితే పలువురు నిర్మాతలు, దిల్‌రాజు చేతుల మీదుగా చివరకు ఈ ప్రాజెక్ట్ కృష్ణ నిర్మాణంలో లాక్ అయిందని వివరించారు. కథపై ఉన్న నమ్మకంతోనే ఈ వేదికపైకి వచ్చానని, చిన్న టౌన్ బ్యాక్‌డ్రాప్‌లో వస్తున్న ఈ ఎమోషనల్ లవ్ స్టోరీ ప్రేక్షకుల హృదయాలను హత్తుకుంటుందని ధీమా వ్యక్తం చేశారు. హీరో హర్ష్ రోషన్‌కు ఈ సినిమా కెరీర్‌లో మంచి మైలురాయిగా నిలవాలని, హీరోయిన్ నక్షత్రతో పాటు టీమ్ మొత్తానికి భారీ విజయం దక్కాలని ఆకాంక్షించారు. అలాగే మ్యూజిక్ డైరెక్టర్ విజయ్ బులగాని స్వరాలు, బ్యాక్‌గ్రౌండ్ స్కోర్ సినిమాను మరో స్థాయికి తీసుకెళ్లాయని ప్రశంసించారు.