పాన్ ఇండియా లెవెల్‌లో క్రేజ్ గడించిన కథానాయికల్లో సమంత ఒకరు. అయితే, ఆమె ఈ స్థాయికి అంత ఈజీగా చేరుకోలేదు. ఎన్నో కష్టాలు, సవాళ్ళను ఎదుర్కొని.. ఒక్కో మెట్టు ఎక్కుతూ వచ్చింది. వృత్తిపరంగానే కాకుండా, వ్యక్తిగతంగానూ ఎన్నో ఒడిదుడుకుల్ని ఎదుర్కొంది. జెస్సీ (ఏం మాయ చేశావే)గా యువత మనసు దోచిన ఈ భామ.. ఆ తర్వాత నటన పరంగా ఎన్నో విమర్శల్ని ఎదుర్కొంది. అందంతో నెట్టుకొస్తోందే తప్ప, యాక్టింగ్ రాదంటూ ఎందరో పెదవి విరిచారు. అలాంటి వాళ్ళందరి నోళ్ళు మూయించేలా తన ప్రతిభ చాటి, ఇప్పుడు జాతీయ స్థాయిలోనే తన సత్తా చాటుతోంది.
ముఖ్యంగా.. నాగ చైతన్యతో విడాకులు తీసుకున్న తర్వాత నుంచి సమంత ఫుల్ బిజీ అయిపోయింది. తెలుగు, హిందీ, తమిళ భాషల్లో వరుసగా క్రేజీ ప్రాజెక్టులు చేస్తోంది. ‘ద ఫ్యామిలీ మ్యాన్-2’ సిరీస్‌తో జాతీయ స్థాయిలో గుర్తింపు పొందిన సమంత.. ఓ హాలీవుడ్ ప్రాజెక్ట్‌లోనూ నటిస్తోంది. లేటెస్ట్ న్యూస్ ప్రకారం.. మరో పాన్ ఇండియా సినిమాకు సంతకం చేసిందట! డెబ్యూ డైరెక్టర్ చెప్పిన కథతో ఇంప్రెస్ అవ్వడంతో, ఈ సినిమా చేసేందుకు సమంత పచ్చజెండా ఊపిందని సమాచారం. అయితే.. దర్శకుడితో పాటు ఇతర నటీనట & సాంకేతిక బృందం వివరాలు ఇంకా తెలియాల్సి ఉంది. ఓ ప్రముఖ నిర్మాణ సంస్థ ఈ చిత్రాన్ని భారీ బడ్జెట్‌తో నిర్మించనుందట!
ఇదిలావుండగా.. ప్రస్తుతం సమంత శాకుంతలం, యశోద సినిమాలతో బిజీగా ఉంది. ఈ రెండు సినిమాల పనులు దాదాపు తుది దశకు చేరుకున్నాయి. పోస్ట్ ప్రొడక్షన్ పనులు ముగిసిన వెంటనే, విడుదలకు సిద్ధం కానున్నాయి. మరోవైపు.. మరో వెబ్‌సిరీస్‌కు అమెజాన్ ప్రైమ్‌తో ఒప్పందం కూడా కుదుర్చుకుంది.
