RK Sagar: మొగలి రేకులు ఆర్కే నాయుడుకు ఈసారైనా హిట్ అందేనా.. ?
RK Sagar: మొగలిరేకులు సీరియల్ తో ఆర్కే నాయుడుగా మారిపోయాడు సాగర్. తనకు పేరు తెచ్చిన పాత్ర పేరునే ఇంటిపేరుగా మార్చుకొని ఆర్కే సాగర్ గా కొనసాగుతున్నాడు. ఇక మొగలి రేకులు సీరియల్ తరువాత సాగర్ కు ఎన్నో సీరియల్ అవకాశాలు వచ్చాయి. కానీ, తాను హీరోగా వెండితెరపై నిరూపించుకోవాలని అన్ని ఆఫర్స్ ను తిరస్కరించాడు. అలానే సిద్దార్థ్ అనే సినిమాతో టాలీవుడ్ కు హీరోగా పరిచయమయ్యాడు. ఈ సినిమా ఆశించిన ఫలితాన్ని అందుకోలేకపోయింది. ఆ తరువాత దిల్ రాజు నిర్మాణంలో షాదీ ముబారక్ అని ఒక సినిమా చేశాడు. ఇది సాగర్ కు మంచి పేరునే తీసుకొచ్చిపెట్టింది. ఇక చాలా గ్యాప్ తరువాత సాగర్ నటిస్తున్న చిత్రం ది 100. రాఘవ్ ఓంకార్ శశిధర్ దర్శకత్వం వహిస్తున్న ఈ చిత్రాన్ని క్రియా ఫిల్మ్ కార్ప్, ధమ్మ ప్రొడక్షన్స్ బ్యానర్లపై రమేష్ కరుటూరి, వెంకీ పూశడపు, జె తారక్ రామ్ సంయుక్తంగా ఈ చిత్రాన్ని నిర్మిస్తున్నారు.
ఇక తాజాగా ఈ సినిమా ఫస్ట్లుక్, మోషన్ పోస్టర్ను భారత మాజీ ఉపరాష్ట్రపతి వెంకయ్యనాయుడు లాంచ్ చేశారు. ఫస్ట్ లుక్ & మోషన్ పోస్టర్ లో ఆర్కే సాగర్ విక్రాంత్ ఐపీఎస్ గా పరిచయం అయ్యాడు. ఖాకీ దుస్తులు ధరించి, చేతిలో తుపాకీతో కనిపించాడు. స్పోర్టింగ్ షేడ్స్, అతని ముఖంలో ఇంటన్సిటీ ని గమనించవచ్చు. మోషన్ పోస్టర్ నెంబర్ 100 యొక్క ప్రాముఖ్యతను వివరిస్తుంది. “ఇది కేవలం ఒక నెంబర్ కాదు, ఇది ఒక ఆయుధం” అని చెప్పుకొచ్చారు. మిషా నారంగ్ కథానాయికగా నటిస్తుండగా, ధన్య బాలకృష్ణ కీలక పాత్రలో కనిపించనున్నారు. ప్రస్తుతం షూటింగ్ జరుపుకుంటున్న ఈ చిత్రం త్వరలోనే ప్రేక్షకుల ముందుకు రానుంది. మరి ఈ సినిమాతోనైనా మొగలి రేకులు ఆర్కే నాయుడు హిట్ అందుకుంటాడా.. ? అనేది చూడాలి.