Magadheera: ఇప్పుడు రామ్‌చరణ్ వంతు.. ‘మగధీర’ స్పెషల్ షోలు

Magadheera: టాలీవుడ్‌లో ప్రస్తుతం రీ రిలీజ్ సినిమాల హవా నడుస్తోంది. కొత్త సినిమాల కంటే రీ రిలీజ్ సినిమాలకే ఎక్కువ కలెక్షన్స్ వస్తుండటం ఇండస్ట్రీ వర్గాలనే ఆశ్చర్యపరుస్తోంది. ఇటీవల మహేష్‌బాబు పోకిరి, పవన్ కళ్యాణ్ జల్సా, చిరంజీవి ఘరానా మొగుడు సినిమాలకు సంబంధించి స్పెషల్ షోలు ప్రదర్శించారు. తాజాగా బాలయ్య చెన్నకేశవరెడ్డి సినిమా స్పెషల్ షోలు ప్రదర్శిస్తున్నారు. కొన్ని చోట్ల అయితే రెగ్యులర్ సినిమాగా చెన్నకేశవరెడ్డిని రోజుకు 4 ఆటలుగా ప్రదర్శిస్తూ వసూళ్లు దండుకుంటున్నారు. అంతేకాకుండా హాలీవుడ్ బ్లాక్ బస్టర్ అవతార్ సినిమాను కూడా భారీ ఎత్తున రీ రిలీజ్ చేశారు. గత రెండు వారాలుగా బాక్సాఫీస్ దగ్గర కొత్త సినిమాలు ఫ్లాప్ అవుతుండటం కూడా రీ రిలీజ్ సినిమాలకు కలిసొచ్చింది.

Read Also: Disco Santi Emotional: బావ చనిపోయిన తర్వాత.. బాలయ్య ఒక్కరే కాల్​ చేశారు

ఈ నేపథ్యంలో రామ్‌చరణ్ సినిమా ఇండస్ట్రీలోకి అడుగుపెట్టి 15 ఏళ్లు పూర్తవుతున్న సందర్భంగా అతడు నటించిన మగధీర సినిమా స్పెషల్ షోలను ప్రదర్శించబోతున్నారు. విశాఖ మద్దిలపాలెంలోని కిన్నెర థియేటర్‌లో ఈనెల 28న మగధీర స్పెషల్ షోను ప్రదర్శిస్తామని థియేటర్ యాజమాన్యం ప్రకటించింది. ఈ షోకు సంబంధించిన టిక్కెట్లను బుక్ మై షో, పేటీఎం, టిక్కెట్ న్యూ వంటి ప్లాట్‌ఫాంలలో ఇప్పటికే విక్రయిస్తుండగా ఫుల్ డిమాండ్ ఏర్పడింది. మరిన్ని చోట్ల కూడా మగధీర షోలను ప్రదర్శించేందుకు సిద్ధమవుతున్నట్లు తెలుస్తోంది. ఏదేమైనా పోకిరి మూవీ టాలీవుడ్‌లో ఓ ట్రెండ్ సెట్ చేసిందనే చెప్పాలి. అటు త్వరలో ప్రభాస్ బిల్లా, పవన్ ఖుషి సినిమాల ప్రత్యేక షోలను ప్రదర్శించబోతుండటం విశేషం.