RC 17 : రామ్ చరణ్ – సుకుమార్ సినిమా ఇప్పట్లో సెట్స్ పైకి వెళ్లదా?

‘రంగస్థలం’ వంటి బ్లాక్ బస్టర్ హిట్ తర్వాత.. మెగా పవర్ స్టార్ రామ్‌చరణ్, క్రియేటివ్ డైరెక్టర్ సుకుమార్ కాంబినేషన్‌లో మరో భారీ చిత్రం రానున్న సంగతి తెలిసిందే. ఆర్సీ 17 వర్కింగ్ టైటిల్‌తో గతంలోనే ఈ ప్రాజెక్ట్ అనౌన్స్ చేశారు. ‘పుష్ప’ సినిమాతో పాన్ ఇండియా స్థాయిలో సంచలనం సృష్టించిన సుకుమార్ ఇప్పుడు చరణ్‌తో అంతకుమించి ప్లాన్ చేస్తున్నాడు. ప్రస్తుతం ఈ సినిమా కథ పై కసరత్తులు చేస్తున్నాడు సుక్కు. ఇప్పటికే కథ విషయమై చరణ్, సుకుమార్ సుదీర్ఘంగా చర్చించుకున్నట్టు టాక్.

అయితే కథా చర్చలు ఫైనల్ స్టేజ్‌కి చేరుకున్నప్పటికీ ఈ ప్రాజెక్ట్ రెగ్యులర్ షూటింగ్ మాత్రం దసరా పండగ తర్వాతే ప్రారంభం కానుందని సమాచారం. ఇందుకు ప్రధాన కారణం రామ్‌చరణ్‌కు అయిన గాయమేనని తెలుస్తోంది. ఇటీవల విడుదలైన ‘పెద్ది’ చిత్రీకరణ సమయంలో చరణ్ చేతికి గాయమైంది. ఇప్పుడు ఆ చేతికి సర్జరీ చేయించుకోనున్నారు చరణ్. సర్జరీ పూర్తయ్యాక కనీసం రెండు నుండి మూడు నెలల పాటు పూర్తిగా విశ్రాంతి తీసుకోవాల్సి ఉంటుంది. ఈ గ్యాప్‌లో సుకుమార్ ఆర్సీ 17 ప్రీ-ప్రొడక్షన్ వర్క్ పూర్తి చేయనున్నాడు. కథ, లొకేషన్ల వేట, ఇతర సాంకేతిక పనులు ముగియడానికి దసరా వరకు సమయం పడుతుంది. కాబట్టి అంతా పక్కాగా సిద్ధం చేసుకుని దసరా శుభ ముహూర్తాన ఈ క్రేజీ కాంబోను సెట్స్‌పైకి తీసుకెళ్లేలా ప్లాన్ చేస్తున్నారు. అయితే, ఇలాంటి విషయాల్లో క్లారిటీ రావాలంటే.. మేకర్స్ నుంచి అధికారిక ప్రకటన రావాల్సి ఉంది. కానీ ఆర్సీ 17 ఎప్పుడొచ్చిన బాక్సాఫీస్ దగ్గర సరికొత్త బెంచ్‌మార్క్ క్రియేట్ చేస్తుందనే అంచనాలున్నాయి.