Ram Charan: “ఎన్నాళ్ళో వేచిన ఉదయం..” అంటూ మెగాస్టార్ చిరంజీవి ఇంట ఆనందగీతాలాపన సాగనుంది. చిరంజీవి నటవారసుడు మెగాపవర్ స్టార్ రామ్ చరణ్ కు ఉపాసనతో 2012 జూన్ 14న వివాహమయింది. అప్పటి నుంచీ మెగాస్టార్ ఫ్యాన్స్ తమకు ఓ బుల్లి హీరో ఉదయిస్తాడని ఆశగా ఎదురు చూస్తున్నారు. దాదాపు పదేళ్ళ తరువాత అభిమానుల అభిలాష నెరవేరబోతోంది. రామ్ చరణ్- ఉపాసన దంపతులు త్వరలోనే తల్లిదండ్రులు కాబోతున్నారు. ఈ విషయం సోషల్ మీడియాలో దర్శన మిచ్చింది. హనుమాన్ ఆశీస్సులతో రామ్ చరణ్ – ఉపాసన దంపతులు తమ తొలి సంతానాన్ని పొందబోతున్నారని చిరంజీవి, ఆయన సతీమణి సురేఖ, అలాగే ఉపాసన కన్నవారు శోభన, అనిల్ కామినేని సంయుక్తంగా ఓ ప్రకటనలో పేర్కొనడం విశేషం! గతంలో పలుమార్లు అటు చెర్రీని, ఇటు ఉపాసనను వారి సంతానం విషయమై ప్రశ్నించగా, దేనికైనా సమయం రావాలని చెప్పేవారు. ఆ సమయం ఇన్నాళ్ళకు వారింటి తలుపు తట్టిందన్న మాట!
చిరంజీవి స్వయంగా ఆంజనేయస్వామి భక్తులు. చిరంజీవి అంటే హనుమాన్ మరో పేరు. చిరంజీవి కన్నతల్లి పేరు కూడా అంజనమ్మ. చెర్రీ పూర్తి పేరు రామ్ చరణ్ తేజ – అంటే రాముని చరణాల వద్ద వెలిగే తేజం అనగా హనుమంతుడు అనే అర్థం! ఇలా ఎలా చూసినా, చిరంజీవి కుటుంబసభ్యులకు ఆంజనేయుడంటే ఎంతో భక్తి. అదీగాక తమ కొణిదెల బ్యానర్ లోనూ హనుమంతుడే కనిపించేలా లోగోను తయారు చేసుకున్నారు. ఆ ఆంజనేయ స్వామి కరుణతో చెర్రీ – ఉపాసన దంపతులు ‘అమ్మా, నాన్న’ అన్న పిలుకు నోచుకోబోతున్నారని అభిమానులు ఆనందిస్తున్నారు. మరి ఉపాసన ఏ తేదీన ప్రసవించబోతున్నారో ఇంకా తెలియలేదు. ఏది ఏమైనా రామ్ చరణ్ తండ్రి కాబోతున్నారన్న వార్త మెగాస్టార్ ఫ్యాన్స్ అందరికీ ఆనందం పంచే అంశమే!