కేజీఎఫ్: చాప్టర్ 2 బ్లాక్‌బస్టర్ విజయం సాధించడం.. కేజీఎఫ్3 కూడా ఉంటుందని ఆ సినిమాలోనే దర్శకుడు ప్రశాంత్ నీల్ సంకేతాలివ్వడంతో.. ‘కేజీఎఫ్3’కి ఆడియన్స్ నుంచి ఇప్పటినుంచే డిమాండ్ పెరిగిపోయింది. దీంతో మేకర్స్ ఆ దిశగా పనులు కూడా మొదలుపెట్టేశారు. ఈ ఏడాది డిసెంబర్ నుంచే కేజీఎఫ్3 ఉంటుందని నిర్మాత విజయ్ కిరంగదూర్ చెప్పాడంటే.. మేకర్స్ ఎంత ప్లానింగ్‌లో ఉన్నారో అర్థం చేసుకోవచ్చు. దీపం ఉన్నప్పుడే ఇల్లు చక్కదిద్దుకోవాలన్నట్టు.. క్రేజ్ ఉన్నప్పుడే క్యాష్ చేసుకోవాలన్న ఉద్దేశంతో మేకర్స్ ‘కేజీఎఫ్3’కి రంగం సిద్ధం చేస్తున్నట్టు తెలిసింది.
ఇదే సినీ ప్రియులకు కిక్కిచ్చే న్యూస్ అనుకుంటే, ఇదే సమయంలో నిర్మాత విజయ్ అంతకుమించిన మరో క్రేజీ అప్డేట్ ఇచ్చాడు. తాము మార్వెల్ తరహాలో ఓ యూనివర్స్ క్రియేట్ చేయాలనుకుంటున్నామని చెప్పాడు. డాక్టర్ స్ట్రేంజ్ లేదా స్పైడర్‌మ్యాన్ సిరీస్‌లలో ఎలా హీరోలు కలిసొచ్చారో, అలాగే డిఫరెంట్ సినిమాల నుంచి డిఫరెంట్ హీరోలను కలిపి ఒక కొత్త సినిమాటిక్ వరల్డ్‌ని సృష్టించాలనుకుంటున్నామని పేర్కొన్నాడు. అలా చేయడం వల్ల, మరింత మంది ప్రేక్షకులకు చేరువైనట్టవుతుందని విజయ్ కిరంగదూర్ స్పష్టం చేశారు. ఈ లెక్కన, కొన్ని రోజుల క్రితం సినీ ప్రియులు కేజీఎఫ్3, సలార్‌కి లింక్ ఉండొచ్చని వేసుకున్న లెక్కలు నిజమేనన్నమాట!