Ponniyan Selvan: అలరిస్తోన్న మణిరత్నం ‘పొన్నియన్ సెల్వన్’ టీజర్!

ప్రస్తుతం మనదేశంలో ఏ కాస్ట్యూమ్ డ్రామా తెరకెక్కినా, దానిని రాజమౌళి ‘బాహుబలి’తో పోల్చడం సర్వ సాధారణమై పోయింది. ప్రముఖ దర్శకుడు మణిరత్నం రూపొందించిన అత్యంత భారీ చిత్రం ‘పొన్నియన్ సెల్వన్’ మొదటి భాగం టీజర్ శుక్రవారం సాయంత్రం విడుదలయింది. ఇందులోని సీన్స్ చూడగానే, అప్పుడే ‘బాహుబలి’తో పోల్చడం సాగుతోంది. రాజమౌళి జానపద చిత్రంతో జనాన్ని మెప్పిస్తే, మణిరత్నం చారిత్రకంతో ‘పొన్నియన్ సెల్వన్’ను రూపొందించారు. ఈ సెప్టెంబర్ లోనే ఈ భారీ చారిత్రక చిత్రం ప్రేక్షకుల ముందుకు రానుంది. 1950లలో కల్కి కృష్ణమూర్తి కలం నుండి జాలువారిన ‘పొన్నియన్ సెల్వన్’ నవల ఈ చిత్రానికి ఆధారం!

‘పొన్నియన్ సెల్వన్’ ట్రైలర్ లో విక్రమ్, కార్తి, జయం రవి, జయరామ్, పార్తిబన్, ప్రకాశ్ రాజ్, ఐశ్వర్యారాయ్ బచ్చన్, త్రిష తదితరులు దర్శనమిస్తారు. ఆరంభంలోనే సముద్రంలో వస్తున్న నౌకలు కనిపించి, భారీతనం కొట్టొచ్చినట్టు కనిపిస్తుంది. ఇక విక్రమ్ పాత్ర “ఈ రక్తం, పాట, వేట అన్నీ మరచిపోవడానికి..గతాన్ని మరచిపోవడానికి.. ఆమెను మరచిపోవడానికి.. నన్ను నేనే మరచిపోవడానికి..” అంటూ కేకలు వేస్తూ కనిపిస్తుంది. దీనిని బట్టి ఈ తొలి భాగంలో ప్రేమకథ ప్రధానంగా ఉంటుందని తెలుస్తోంది. టీజర్ ఆరంభంలోనే “ఛోళాస్ ఆర్ కమింగ్” అంటూ ప్రకటించారు. మరి ఈ ఛోళులు జనాన్ని ఏ తీరున అలరిస్తారో సెప్టెంబర్ 30న తేలనుంది.