Pawan Kalyan : ఉస్తాద్‌ భగత్‌సింగ్‌ ప్రమోషన్స్‌కు పవన్‌ వస్తాడా?

టాలీవుడ్‌లో పవన్‌ కల్యాణ్‌ సినిమా వస్తుందంటే ఆ హంగామానే వేరు, అయితే, సినిమా షూటింగ్‌ల కంటే ఇప్పుడు పవన్‌ ఇచ్చే ‘ప్రమోషన్‌ డేట్స్‌’ కోసమే నిర్మాతలు వేయి కళ్లతో ఎదురుచూడాల్సిన పరిస్థితి నెలకొంది. తాజాగా హరీశ్‌ శంకర్‌ దర్శకత్వంలో వస్తున్న ‘ఉస్తాద్‌ భగత్‌సింగ్‌’ విడుదలకు సిద్ధమవుతున్న వేళ.. పవన్‌ ఈ సినిమా ప్రచారానికి ఎంత సమయం కేటాయిస్తారనేది ఇప్పుడు ఇండస్ట్రీలో ఒక పెద్ద మిస్టరీగా మారింది. గబ్బర్‌సింగ్‌ తర్వాత పవన్‌ కల్యాణ్‌ – హరీశ్‌ శంకర్‌ కాంబినేషన్‌లో వస్తున్న సినిమా కావడంతో ‘ఉస్తాద్‌ భగత్‌సింగ్‌’పై భారీ అంచనాలు ఉన్నాయి, మూడేళ్ల క్రితం మొదలైన ఈ ప్రాజెక్ట్‌ ఎట్టకేలకు ఈ నెల 26న థియేటర్లలోకి రాబోతోంది. అయితే, ఇప్పుడు చర్చ అంతా సినిమా ప్రమోషన్ల చుట్టూనే తిరుగుతోంది.

Also Read : Ram Charan : హై ఫీవర్’లోనూ చరణ్ డాన్స్.. బయటపెట్టిన బుచ్చిబాబు!

గతంలో ‘హరిహర వీరమల్లు’ విషయంలో పవన్‌ వ్యవహరించిన తీరు అందరినీ ఆశ్చర్యపరిచింది, ఐదేళ్ల పాటు సెట్స్‌పై ఉన్న ఆ సినిమా ఆర్థిక ఇబ్బందుల్లో చిక్కుకున్నప్పుడు పవన్‌ స్వయంగా చొరవ తీసుకుని మనీ అడ్జస్ట్‌మెంట్‌ చేయడమే కాకుండా, సినిమాకు హైప్‌ రావడం కోసం ఏకంగా నాలుగైదు రోజుల పాటు వరుసగా ఇంటర్వ్యూలు, ప్రెస్‌మీట్లలో పాల్గొన్నారు. ఇప్పుడు ‘ఉస్తాద్‌’ నిర్మాతలు కూడా మూడేళ్లుగా వడ్డీలు కడుతూ సినిమాను పూర్తి చేసిన నేపథ్యంలో.. వారికి అండగా ఉండటానికి పవన్‌ మళ్లీ అన్నీ తానై ప్రచార బాధ్యతలు తీసుకుంటారా? అనేది చూడాలి. మరోవైపు ‘OG’ సినిమాకు ఉన్న విపరీతమైన హైప్‌ దృష్ట్యా పవన్‌ పెద్దగా ప్రమోషన్ల జోలికి వెళ్లలేదు. కేవలం ప్రీ రిలీజ్‌ ఈవెంట్‌తోనే సరిపెట్టేశారు, మరి ‘ఉస్తాద్‌’కు ఇప్పటికే ఉన్న క్రేజ్ సరిపోతుందని భావిస్తే, పవన్‌ కేవలం ఈ నెల 19న జరగబోయే ప్రీ రిలీజ్‌ ఫంక్షన్‌కు మాత్రమే పరిమితం అయ్యే అవకాశం ఉంది. హరీశ్‌ శంకర్‌ సినిమాల్లో పవన్‌ ఎనర్జీ నెక్స్ట్ లెవల్‌లో ఉంటుంది. మరి ఆ ఎనర్జీని ప్రమోషన్లలో కూడా చూపిస్తారా లేదో తెలియాలంటే మరో వారం రోజులు ఆగాల్సిందే.