Varanasi: ఫ్యామిలీ వెకేషన్‌లో మహేష్ బాబు.. త్వరలోనే ‘వారణాసి’ షూటింగ్‌లోకి రీఎంట్రీ!

Varanasi : సూపర్ స్టార్ మహేష్ బాబు, దర్శకధీరుడు ఎస్.ఎస్. రాజమౌళి కాంబినేషన్‌లో తెరకెక్కుతున్న ప్రతిష్టాత్మక అడ్వెంచర్ డ్రామా ‘వారణాసి’పై అభిమానుల అంచనాలు రోజురోజుకూ పెరుగుతున్నాయి. భారీ స్థాయిలో రూపొందుతున్న ఈ సినిమా షూటింగ్ ఇప్పటికే వేగంగా కొనసాగుతుండగా, వరుస షెడ్యూల్స్ మధ్య మహేష్ బాబుకు చిన్న విరామం లభించింది. ప్రస్తుతం ఆయన తన కుటుంబంతో కలిసి ఫ్రాన్స్‌లో వెకేషన్‌ను ఎంజాయ్ చేస్తుండగా, ఈ విరామం ముగిసిన వెంటనే తిరిగి షూటింగ్‌లో పాల్గొననున్నట్లు సమాచారం. దీంతో అభిమానులు మరో కీలక షెడ్యూల్ కోసం ఆసక్తిగా ఎదురుచూస్తున్నారు.

ఇటీవల పూర్తయిన షెడ్యూల్ ఈ సినిమాకు అత్యంత కీలకమైనదిగా చెబుతున్నారు. ప్రత్యేకంగా నిర్మించిన భారీ వారణాసి సెట్‌లో ఈ భాగాన్ని చిత్రీకరించారు. దీనికోసం వారణాసి నగర వాతావరణాన్ని ప్రతిబింబించేలా భారీ సెట్‌ను నిర్మించారు. ఈ షెడ్యూల్‌లో మహేష్ బాబుపై కథకు కీలకమైన కొన్ని సన్నివేశాలను రాజమౌళి తెరకెక్కించినట్లు తెలుస్తోంది. రాజమౌళి సినిమాలు అంటే కేవలం భారీ బడ్జెట్ మాత్రమే కాదు, ప్రతి ఫ్రేమ్‌లోనూ ప్రత్యేక శ్రద్ధ తీసుకోవడం ఆయన ప్రత్యేకత. అందుకే నిజమైన లొకేషన్‌కు ఏమాత్రం తీసిపోని విధంగా వారణాసి సెట్‌ను రూపొందించినట్లు తెలుస్తోంది.

కె.ఎల్. నారాయణ నిర్మిస్తున్న ఈ పాన్ ఇండియా చిత్రంలో మహేష్ బాబు సరసన ప్రియాంక చోప్రా జోనాస్ కథానాయికగా నటిస్తుండగా, మలయాళ స్టార్ పృథ్వీరాజ్ సుకుమారన్ కీలక పాత్రలో కనిపించనున్నారు. ఇప్పటికే కెన్యాలో చిత్రీకరణ జరిపిన చిత్రబృందం, తదుపరి షెడ్యూల్‌ను మరింత ప్రతిష్టాత్మకంగా ప్లాన్ చేస్తున్నట్లు తెలుస్తోంది. ప్రపంచంలో అత్యంత క్లిష్టమైన షూటింగ్ లొకేషన్లలో ఒకటైన అంటార్కిటికాలో కూడా కొన్ని కీలక సన్నివేశాలను చిత్రీకరించాలని రాజమౌళి భావిస్తున్నారని సమాచారం. ఇది నిజమైతే భారతీయ సినిమా చరిత్రలోనే అరుదైన ప్రయత్నంగా నిలిచే అవకాశం ఉంది. మహేష్ బాబు కెరీర్‌లోనే అత్యంత భారీ ప్రాజెక్ట్‌గా రూపొందుతున్న ఈ చిత్రం ప్రపంచవ్యాప్తంగా భారీ అంచనాల మధ్య 2027 ఏప్రిల్ 7న థియేటర్లలో విడుదల కానుంది. రాజమౌళి, మహేష్ బాబు కాంబినేషన్ ప్రేక్షకులకు ఎలాంటి అనుభూతిని అందించబోతోందో చూడాలనే ఆసక్తి రోజురోజుకూ పెరుగుతోంది.