JD Chakravarthy: ఆర్జీవీకి తెలియకుండా జేడీ చేసిన పని.. కోన వెంకట్‌కు అలా కలిసి వచ్చిందా?

JD Chakravarthy: రామ్ గోపాల్ వర్మ తెరకెక్కించిన ‘సత్య’ సినిమాకు సంబంధించి ఆసక్తికర విషయాన్ని తాజాగా నటుడు, దర్శకుడు జేడీ చక్రవర్తి వెల్లడించారు. ఈ సినిమాలో రచయిత కోన వెంకట్‌కు అవకాశం రావడం వెనుక తన పాత్ర ఉందని ఆయన చెప్పుకొచ్చారు. ఓ ఇంటర్వ్యూలో మాట్లాడిన జేడీ చక్రవర్తి.. కోన వెంకట్ గురించి మాట్లాడుతూ.. చాలామందికి తెలియని ఒక విషయం ఉందని తెలిపారు. ‘సత్య’ సినిమాలో కోన వెంకట్‌కి ఎలా అవకాశం వచ్చిందో చెప్పారు. ఈ సందర్భంగా జేడీ చక్రవర్తి మాట్లాడుతూ.. “రామ్ గోపాల్ వర్మ గారికి తెలియకుండానే కోన వెంకట్ చేత మొదట పాట రాయించాను. వర్మ గారు మాత్రం పాటను వేరే రచయితతో రాయించాలని అనుకున్నారు. కానీ కోన వెంకట్‌పై ఉన్న నమ్మకం, అభిమానం కారణంగా ఆయన చేత పాట రాయించాను” అని చెప్పారు.

అప్పట్లో తాను ‘సత్య’ సినిమా పోస్ట్ ప్రొడక్షన్ పనుల్లో ఉన్నానని, ఎడిటింగ్‌తో పాటు సౌండ్ డిజైన్, ఇతర పనులను కూడా చూసుకున్నానని చెప్పారు. ఆ సమయంలో కోన వెంకట్ రాసిన పాటలను రికార్డ్ చేయించానని వెల్లడించారు. ఆ పాట నచ్చిన తర్వాత అదే నమ్మకంతో కోన వెంకట్‌తో సినిమా డైలాగులు కూడా రాయించినట్లు జేడీ తెలిపారు. “వర్మ గారు సత్యానంద్ గారి చేత రాయించాలని అనుకున్నప్పటికీ, కోన వెంకట్ మీద ఉన్న నమ్మకంతో ఆయనకు అవకాశం ఇచ్చాను” అని అన్నారు. తర్వాత కాలంలో 2004 లో దుబాయ్ శీను సినిమా టైంలో కోన వెంకట్ తనకు ఫోన్ చేసి సినిమాలో నటిస్తే బాగుంటుందని చెప్పారని, అయితే అది తన కోసం కాదని, సినిమా కోసం చేసిన నిర్ణయమని జేడీ స్పష్టం చేశారు. “కోన వెంకట్‌తో నాకు అప్పటికే పరిచయం ఉంది. మాకు మంచి స్నేహం ఉండటంతోనే ఆయన నాకు దుబాయ్ శీను సినిమాలో అవకాశం ఇచ్చారు” అని జేడీ చక్రవర్తి తెలిపారు. ప్రస్తుతం జేడీ చేసిన ఈ కామెంట్స్ సోషల్ మీడియాలో వైరల్ అవుతున్నాయి.