Lakshmi Vs Vishnu: మల్లూవూడ్ లో మంచు ఫ్యామిలీ బాక్సాఫీస్ వార్!

Lakshmi vs Vishnu War In Mollywood: ఇప్పుడు తెలుగు నిర్మాతలు తమ చిత్రాలను మలయాళంలోనూ డబ్ చేసి విడుదల చేస్తున్నారు. అలా ఈ నెల 21న మంచు విష్ణు నటించిన ‘జిన్నా’ సినిమా తెలుగు, హిందీతో పాటు మలయాళంలోనూ విడుదల కాబోతోంది. చిత్రం ఏమంటే 21 తేదీన మలయాళ సూపర్ స్టార్ మోహన్ లాల్ నటించిన ‘మాన్ స్టర్’ మూవీ కూడా రిలీజ్ అవుతోంది. అంటే… ఓ సీనియర్ సూపర్ స్టార్ సినిమాతో మంచు విష్ణు మల్లూవుడ్ లో పోటీ పడబోతున్నాడన్నమాట. అయితే దీనికంటే ఆసక్తికరమైన అంశం ఏమిటంటే… ఆ ‘మాన్ స్టర్’ సినిమాలో విష్ణు సోదరి మంచు లక్ష్మీ ఓ కీలక పాత్రను పోషిస్తూ, మల్లూవుడ్ ఎంట్రీ ఇస్తోంది.

ఈ సినిమా కోసం మంచు లక్ష్మీ రక్తాన్ని చెమటగా మార్చి కష్టపడింది. కేరళ సంప్రదాయ పోరాట కళలను ప్రత్యేకంగా అభ్యసించింది. మలయాళ భాష మీద పట్టు సంపాదించింది. సో… 21వ తేదీన విష్ణు తన ‘జిన్నా’ మూవీని మలయాళంలోనూ రిలీజ్ చేస్తే… అక్కడ అక్కయ్యతో తమ్ముడు పోటీ పడినట్టే! ఒకవేళ తన అక్కయ్య నటించిన సినిమా మీద, తమ ఫ్యామిలీ ఫ్రెండ్ అయిన మోహన్ లాల్ మూవీ మీద ‘జిన్నా’ను ఎందుకు రిలీజ్ చేయడం అనుకుంటే… మరో రోజుకు వాయిదా వేయాల్సిందే. మరి మంచు విష్జు ‘జిన్నా’ మలయాళ వర్షన్ రిలీజ్ విషయంలో ఎలాంటి నిర్ణయం తీసుకుంటాడో చూడాలి.