Mareechika: నిర్మాతగా రచయిత లక్ష్మీ భూపాల!

ప్రముఖ రచయిత లక్ష్మీ భూపాల నిర్మాతగా మారారు. లక్ష్మీ భూపాల ఎంటర్ టైన్ మెంట్ బ్యానర్ లో రెండు సినిమాలు నిర్మిస్తున్నారు. అందులో రెండవది ‘మరీచిక’. దీనిని ఆయన వన్ మోర్ హీరో మీడియా సంస్థకు చెందిన రాజీవ్ చిలకతో కలిసి నిర్మిస్తున్నారు. ‘సినిమా రంగం తనకెంతో ఇచ్చిందని, దానిని తిరిగి ఇవ్వడం బాధ్యతగా భావించి చిత్ర నిర్మాణ రంగంలోకి అడుగు పెట్టాన’ని లక్ష్మీ భూపాల తెలిపారు.

జాతీయ అవార్డు గ్రహీత సతీశ్ కాశెట్టి దర్శకత్వం వహించే ‘మరీచిక’ సినిమాకు కథ, స్క్రీన్ ప్లే, మాటలు, పాటలు లక్ష్మీ భూపాల అందిస్తున్నారు. బ్యూటిఫుల్ హీరోయిన్లు రెజీనా కసాండ్ర, అనుపమా పరమేశ్వరన్ ఈ సినిమాలో కీలక పాత్రలు పోషిస్తున్నారు. విరాజ్ అశ్విన్ మరో ప్రధాన పాత్ర పోషిస్తున్న ఈ మూవీ కాన్సెప్ట్ పోస్టర్ ను గురువారం విడుదల చేశారు. ఈ పోస్ట‌ర్‌ను గ‌మనిస్తే అందులో కేవ‌లం పాదాలు మాత్ర‌మే క‌నిపిస్తున్నాయి. ఆ పాదాల ప్ర‌తిబింబం నీళ్ల‌లో ఓ అమ్మాయి నీడ‌లాగా క‌నిపిస్తోంది. ఈ పోస్ట‌ర్‌కు ‘ప్రేమ ద్రోహం ప్ర‌తీకారం’ అనేది క్యాప్షన్ పెట్టారు. ఇది రొటీన్ మూవీ కాదనే భావన ఈ పోస్టర్ ద్వారా దర్శక నిర్మాతలు కలిగించారు. ‘ఇప్ప‌టికే ఫ‌స్ట్ షెడ్యూల్ చిత్రీక‌ర‌ణ పూర్త‌య్యిందని, ఈ నెల 26 నుంచి రెండో షెడ్యూల్ జ‌రుగుతుందని, లెజెండ్రీ మ్యూజిక్ డైరెక్టర్ మ్యాస్ట్రో ఇళ‌య‌రాజా ఈ రొమాంటిక్ డ్రామాకి సంగీతాన్ని అందిస్తున్నార’ని నిర్మాతలు తెలిపారు. అర‌వింద్ క‌న్నాభిరాన్ ఈ మూవీకి సినిమాటోగ్ర‌ఫీ అందిస్తున్నారు. తాను నిర్మిస్తున్న తొలి చిత్రం వివరాలు సైతం త్వరలోనే వెల్లడిస్తానని, ఆ సినిమా కూడా సెట్స్ పై ఉందని లక్ష్మీ భూపాల తెలిపారు.