Monalisa: ‘నా జీవితం ప్రమాదంలో ఉంది’.. కుంభమేళా ఫేమ్ మోనాలిసా!

Monalisa: ప్రయాగ్‌రాజ్ కుంభమేళా సందర్భంగా సోషల్ మీడియాలో వైరల్‌గా మారిన మోనాలిసా తాజాగా మరోసారి వార్తల్లో నిలిచారు. తన తండ్రి తన పాస్‌పోర్ట్, డబ్బు తీసుకున్నారని, తన ప్రాణానికి ప్రమాదం ఉందని ఆరోపిస్తూ ఆమె కేరళలోని ఎర్నాకులం సెంట్రల్ పోలీస్ స్టేషన్‌ను ఆశ్రయించారు. తనకు రక్షణ కల్పించాలని కోరుతూ పోలీసులకు ఫిర్యాదు చేశారు. మోనాలిసా తన న్యాయవాదితో కలిసి ఆదివారం సాయంత్రం ఎర్నాకులం సెంట్రల్ పోలీస్ స్టేషన్‌కు వెళ్లి భద్రతను పునరుద్ధరించాలని కోరుతూ దరఖాస్తు సమర్పించారు. ఈ సందర్భంగా ఆమె మాట్లాడుతూ.. తన తండ్రి తన పాస్‌పోర్ట్, డబ్బు తీసుకున్నారని, తన ప్రాణానికి ముప్పు ఉందని ఆమె ఆరోపించారు. ఇదిలా ఉండగా.. మోనాలిసా భర్త ఫర్మాన్ ఖాన్‌పై కిడ్నాప్ ఆరోపణలు ఉన్నాయి. ఆమె మైనర్ అని పేర్కొంటూ మోనాలిసా తండ్రి ఇచ్చిన ఫిర్యాదు ఆధారంగా మధ్యప్రదేశ్ పోలీసులు కేసు నమోదు చేశారు. అయితే తాను మేజర్ అని, తన ఇష్టప్రకారమే ఫర్మాన్ ఖాన్‌ను వివాహం చేసుకున్నానని మోనాలిసా చెబుతున్నట్లు సమాచారం.

గత నెలలో తనకు ప్రాణహాని ఉందంటూ మోనాలిసా కేరళ హైకోర్టును ఆశ్రయించారు. దీంతో కోర్టు ఆమెకు పోలీసు రక్షణ కల్పించాలని ఆదేశించింది. అయితే అనంతరం ఆమెను, ఆమె భర్తను సంప్రదించలేకపోతున్నామని పోలీసులు కోర్టుకు వివరించారు. దీంతో భద్రతను ఉపసంహరించుకోవాలని కోర్టు ఆదేశించింది. అయితే మళ్లీ వాళ్లు సంప్రదిస్తే రక్షణ కల్పించవచ్చని స్పష్టం చేసింది. తాజాగా మోనాలిసా మళ్లీ పోలీసులను ఆశ్రయించడంతో ఈ వ్యవహారం మరోసారి చర్చనీయాంశంగా మారింది. తదుపరి చర్యలపై కొచ్చి నగర పోలీస్ కమిషనర్‌తో సంప్రదించిన తర్వాత నిర్ణయం తీసుకుంటామని ఎర్నాకులం సెంట్రల్ పోలీస్ స్టేషన్ అధికారులు తెలిపారు. కాగా, ప్రయాగ్‌రాజ్ కుంభమేళాలో తన ప్రత్యేకమైన రూపంతో ఆకట్టుకున్న మోనాలిసా ఒక్కసారిగా సోషల్ మీడియాలో వైరల్ అయ్యారు. ఆ తర్వాత ఆమె ఫర్మాన్ ఖాన్‌ను వివాహం చేసుకోవడం, కుటుంబ వివాదాలు, పోలీసు ఫిర్యాదులతో ఆమె పేరు వరుసగా వార్తల్లో నిలుస్తోంది.