KGF: రాకీ భాయ్‌ని ఫాలో అయ్యాడు.. ఆసుపత్రిపాలయ్యాడు

యువతపై సినిమాల ప్రభావం ఎంతుందో ప్రత్యేకంగా చెప్పుకోనవసరం లేదు. ఒక స్టార్ హీరో సినిమా వచ్చిందంటే చాలు.. వాళ్ళ హెయిర్ స్టైల్ దగ్గర నుంచి డ్రెస్సింగ్ స్టైల్, యాటిట్యూడ్ దాకా.. అన్ని అనుసరించడం మొదలుపెడతారు. దాదాపు తమ అభిమాను హీరోలు సినిమాల్లో చేసిన పనులనే, రియల్ లైఫ్‌లోనూ చేయాలని ప్రయత్నిస్తారు. కొందరైతే స్టంట్లు కూడా చేస్తుంటారు. ఇలా చేసి కొందరు లేనిపోని సమస్యల్లో చిక్కుకున్న సందర్భాలున్నాయి. ఇప్పుడు తాజాగా ఓ టీనేజ్ కూడా.. తన అభిమాన హీరోలాగే ఓ ఫీట్ చేయబోయే, ప్రాణాల మీదకు తెచ్చుకున్నాడు.

ఆ వివరాల్లోకి వెళ్తే.. బ్లాక్‌బస్టర్ విజయం సాధించిన ‘కేజీఎఫ్: చాప్టర్2’ని చూసిన ఓ కుర్రాడు, అందులో హీరో సిగరెట్ తాగే స్టైల్‌కి ఫిదా అయ్యాడు. తానూ సరిగ్గా అలాగే చేయాలని అనుకున్నాడు. అంతే, వెంటనే ఒక సిగరెట్ ప్యాకెట్ కొన్నాడు. హీరోలా ఫీల్ అవుతూ, సిగరెట్లన్నీ తాగేశాడు. రెండు రోజుల్లో మొత్తం మూడు ప్యాకెట్లు ఖాళీ చేశాడు. అయితే, ఒకేసారి అన్నీ సిగరెట్స్ కాల్చడం వల్ల అతనికి తీవ్ర గొంతు నొప్పి వచ్చింది. శ్వాస తీసుకోవడానికి కూడా ఇబ్బంది పడ్డాడు. ఆ బాధను భరించలేక, విషయాన్ని తన తల్లిదండ్రులకు చెప్పాడు. దీంతో.. వాళ్ళు వెంటనే ఆ అబ్బాయిని బంజారాహిల్స్‌లోని సెంచురీ ఆసుపత్రిలో చేర్పించారు. వైద్యం అందాక ఆ అబ్బాయి సాధారణ స్థితికి వచ్చాడు.

ఈరోజుల్లో యువతపై సినిమాల ప్రభావం చాలా ఎక్కువగా ఉందని, కాబట్టి తల్లిదండ్రులు తమ పిల్లలు ఏం చేస్తున్నారో తరచూ గమనిస్తూ ఉండాలని డాక్టర్లు సూచిస్తున్నారు. ఒకవేళ అబ్బాయి భయపడి అసలు విషయం చెప్పకుండా ఉండుంటే, పరిస్థితి విషమించేదని వైద్యులు చెప్తున్నారు. కాబట్టి, ఎల్లప్పుడూ అలర్ట్‌గా ఉండాలని చెప్తున్నారు.