Hanu-Man: ఓ బాలీవుడ్.. టాలీవుడ్ ను చూసి నేర్చుకో..?
Hanu-Man: బాలీవుడ్ ను కొద్దిగా ఛాన్స్ దొరికినా నెటిజన్స్ ఆడేసుకుంటున్నారు. ముఖ్యంగా ఆదిపురుష్ కు సంబంధించిన ఏ విషయాన్ని కూడా అస్సలు వదలడం లేదు. ప్రభాస్, కృతి సనన్ జంటగా ఓం రౌత్ దర్శకత్వంలో తెరకెక్కిన సినిమా ఆదిపురుష్. బాలీవుడ్ లోనే బిగ్గెస్ట్ బడ్జెట్ తో ఈ సినిమా తెరకెక్కింది. రాముడిగా ప్రభాస్ కనిపిస్తుండడంతో ఈ సినిమా ఏ రేంజ్ లో ఉండబోతుందో అని ప్రేక్షకులు ఎంతగానో ఎదురుచూశారు. సరే అభిమానులు ఎదురుచూస్తున్నారు కదా అని టీజర్ శాంపిల్ విసిరి ట్రోలర్స్ కు పనిచెప్పాడు. క్వాలిటీ లేని విజువల్ ఎఫెక్ట్స్ ఉండడం ఏమిటి అని అమీర్ పెట్ లో వెయ్యి రూపాయలకు కూడా ఇలాంటి గ్రాఫిక్స్ చేయరు అన్న నిందను మోయాల్సి వచ్చింది.
చిన్న పిల్లల సినిమాల ఉందని, బాలీవుడ్ వేస్ట్ అని ట్రెండ్ చేశారు. ఇక కొద్దిరోజులకు ఈ ట్రోల్స్ తగ్గాయి. ఇప్పుడు మళ్లీ ట్రోలర్స్ తమ నోటికి పనిచెప్పారు. అందుకు కారణం తెలుగులో హనుమాన్ టీజర్ రిలీజ్ అవ్వడమే. ప్రశాంత్ వర్మ దర్శకత్వంలో తేజ సజ్జ, అమ్రితా అయ్యర్ జంటగా నటించిన ఈ చిత్రం టీజర్ ను కొద్దిసేపటి క్రితం మేకర్స్ రిలీజ్ చేశారు. టీజర్ ఆద్యంతం ఆకట్టుకుంది. ముఖ్యంగా విజువల్స్ అయితే వేరే లోకంలోకి తీసుకెళ్లాయి. హాలీవుడ్ రేంజ్ లో టీజర్ ఉంది అంటే అతిశయోక్తి కాదు. కేవలం 15 కోట్ల రూపాయిల బడ్జెట్ తో తెరకేక్కించిన ఈ సినిమా విజువల్స్ 500 కోట్ల రూపాయిలతో నిర్మితమవుతున్న ప్రభాస్ ఆదిపురుష్ టీజర్ విజుయల్స్ కంటే అత్యద్భుతంగా ఉన్నాయి. టాలీవుడ్ కుర్ర డైరెక్టర్ అంత మంచి విజువల్స్ ను అందించాడు.. టాలీవుడ్ ను చూసి నేర్చుకో బాలీవుడ్ అంటూ ట్రోల్స్ చేస్తున్నారు. ఈ రెండు టీజర్లను పక్కపక్కన పెట్టి మరి ఆడేసుకుంటున్నాడు.