Pradeep Ranganathan: మరో తమిళ సినిమా రిలీజ్ చేయబోతున్న ‘దిల్’ రాజు!
Dil Raju: ఇటీవల మణిరత్నం తెరకెక్కించిన ప్రతిష్ఠాత్మక చిత్రం ‘పొన్నియిన్ సెల్వన్’ ను ప్రముఖ నిర్మాత ‘దిల్’ రాజు తెలుగు వారి ముందుకు తీసుకొచ్చారు. అయితే ఈ సినిమా ఆశించిన స్థాయిలో విజయాన్ని అందుకోలేకపోయింది. అయినా నిరుత్సాహపడకుండా ఇప్పుడు మరో తమిళ సినిమాను డబ్ చేసి, రిలీజ్ చేయబోతున్నారు ‘దిల్’ రాజు. తమిళ రచయిత, దర్శకుడు ప్రదీప్ రంగనాథన్ రూపొందించిన ‘లవ్ టుడే’ను ‘దిల్’ రాజు తెలుగులో డబ్ చేస్తున్నారు. ఈ రొమాంటిక్ ఎంటర్ టైనర్ ఇదే నెల 4న తమిళనాట విడుదలై చక్కని విజయాన్ని అందుకుంది. ఇవానా నాయికగా నటించిన ఈ సినిమాలో రాధికా శరత్ కుమార్, సత్యరాజ్, యోగిబాబు కీలక పాత్రలు పోషించారు. యువన్ శంకర్ రాజా అందించిన సంగీతం కూడా ‘లవ్ టుడే’ విజయానికి ప్రధాన కారణమైంది. ఈ చిత్రాన్ని ‘దిల్’ రాజు తెలుగులో రిలీజ్ చేస్తున్న విషయాన్ని చిత్ర కథానాయకుడు, దర్శకుడు ప్రదీప్ రంగనాథన్ అధికారికంగా తెలిపారు. ఇప్పటికే డబ్బింగ్ వర్క్ పూర్తయిన ఈ సినిమా ఇదే నెల 18న రిలీజ్ అవుతున్నట్టు తెలుస్తోంది. యువతరం మెచ్చే అంశాలతో, కాలేజీ నేపథ్యంలో రూపుదిద్దుకున్న ఈ సినిమా తెలుగువారికీ కనెక్ట్ అవుతుందనే నమ్మకంతోనే ‘దిల్’ రాజు పంపిణీ బాధ్యతలను భుజానికెత్తుకున్నారట. మరి ఆయన నమ్మకాన్ని తెలుగు ప్రేక్షకులు ఏ మేరకు నిలబెడతారో చూడాలి.