AVD తర్వాత మరో మల్టీప్లెక్స్.. నార్త్ హైదరాబాద్‌పై రౌడీ హీరో కన్ను!

Vijay Deverakonda: రౌడీ హీరో విజయ్ దేవరకొండ సినిమాలతో పాటు బిజినెస్ రంగంలోనూ తనదైన ముద్ర వేస్తున్నారు. ఏషియన్ గ్రూప్ భాగస్వామ్యంతో మహబూబ్‌నగర్‌లో ఇప్పటికే AVD Cinemas పేరుతో మల్టీప్లెక్స్‌ను నిర్వహిస్తున్న విజయ్.. తాజాగా మరో మల్టీప్లెక్స్ ఏర్పాటుపై ఆలోచిస్తున్నట్లు సమాచారం. ఉత్తర హైదరాబాద్‌లోని మధ్యతరగతి ప్రేక్షకులను దృష్టిలో పెట్టుకుని మేడ్చల్ లేదా మల్కాజ్‌గిరి ప్రాంతాల్లో కొత్త మల్టీప్లెక్స్ ఏర్పాటు చేసే ఆలోచనలో ఉన్నట్లు సినీ వర్గాల్లో చర్చ జరుగుతోంది. అయితే ఈ ప్రాజెక్ట్ ప్రస్తుతం స్టార్టింగ్ స్టేజ్‌లోనే ఉన్నట్లు తెలుస్తోంది. స్థలం, ఇన్వెస్ట్‌మెంట్, నిర్మాణం వంటి అంశాలపై ఇంకా తుది నిర్ణయం తీసుకోలేదని సమాచారం. ఈ ప్లాన్ కార్యరూపం దాల్చితే ఉత్తర హైదరాబాద్‌లోని ప్రేక్షకులకు మరిన్ని ఆధునిక థియేటర్ ఆప్షన్స్ అందుబాటులోకి వచ్చే అవకాశం ఉంది.

ఇక విజయ్ దేవరకొండ సినిమాల విషయానికి వస్తే ప్రస్తుతం ఆయన నటిస్తున్న సినిమాల్లో ‘రణబాలి’పై భారీ హైప్ నెలకొంది. పెళ్లి తర్వాత కలిసి విజయ్–రష్మిక నటిస్తున్న తొలి సినిమా ఇదే కావడంతో ఈ మూవీపై మరింత ఆసక్తి నెలకొంది. తాజాగా ‘రణబాలి’ టీజర్‌కు సంబంధించి మేకర్స్ కీలక అప్‌డేట్ ఇచ్చారు. ఈ సినిమా మాస్ యాక్షన్ టీజర్‌ను సెప్టెంబర్ 9న విడుదల చేయనున్నట్లు అధికారికంగా ప్రకటించారు. ‘‘ది లెజెండ్ ఆఫ్ ది కర్స్డ్ ల్యాండ్ రైజెస్’’ అంటూ టీజర్‌పై మరింత క్యూరియాసిటీ పెంచారు. ‘రణబాలి’ చిత్రాన్ని అక్టోబర్ 16, 2026న ప్రపంచవ్యాప్తంగా గ్రాండ్‌గా విడుదల చేయనున్నట్లు చిత్రబృందం వెల్లడించింది.