Anil Ravipudi : అనిల్ రావిపూడి సినిమా పేరుతో భారీ మోసం.. నిర్మాతల సంచలన ప్రకటన!

టాలీవుడ్‌లో క్రేజీ కాంబినేషన్‌గా పేరు తెచ్చుకున్న విక్టరీ వెంకటేష్ మరియు బ్లాక్‌బస్టర్ డైరెక్టర్ అనిల్ రావిపూడి కాంబోలో తెరకెక్కుతున్న లేటెస్ట్ మూవీ #VenkyAnil5 (#NKRAR2). సాహు గారపాటి నిర్మాణంలో, జీవీ ప్రకాశ్‌ సంగీతంలో షైన్ స్క్రీన్స్ మరియు జీ స్టూడియోస్ సంయుక్తంగా నిర్మిస్తున్న ఈ ప్రతిష్టాత్మక చిత్రంపై ఇప్పటికే ప్రేక్షకుల్లో భారీ అంచనాలు ఉన్నాయి. అయితే, ఈ క్రేజ్ ఆసరాగా చేసుకుని చిత్ర పరిశ్రమలోకి అడుగుపెట్టాలనుకునే అమాయక యువతీ యువకులను బురిడీ కొట్టించడానికి కొందరు కేటుగాళ్లు రంగంలోకి దిగారు. ఈ సినిమా పేరుతో సోషల్ మీడియాలో సాగుతున్న ఒక పెద్ద మోసంపై చిత్ర యూనిట్ అధికారికంగా స్పందిస్తూ తీవ్ర హెచ్చరికలు జారీ చేసింది.

సినిమాలో నటించే అవకాశం ఉందంటూ సోషల్ మీడియా వేదికగా కొందరు నకిలీ కాస్టింగ్ కాల్స్ నడుపుతున్నట్లు చిత్ర బృందం గమనించింది. దీనిపై ప్రొడక్షన్ హౌస్ అత్యంత వేగంగా స్పందిస్తూ ఒక అధికారిక నోట్‌ను విడుదల చేసింది. “మా సినిమా పేరుతో ఒక నకిలీ కాస్టింగ్ కాల్ సోషల్ మీడియా మరియు ఇతర మాధ్యమాల ద్వారా ప్రచారం అవుతున్నట్లు మా దృష్టికి వచ్చింది. ఆ కాస్టింగ్ కాల్‌కు మా చిత్ర బృందానికి ఎలాంటి సంబంధం లేదు” అని నిర్మాతలు తేల్చి చెప్పారు. సినిమాల్లో ఛాన్స్ కోసం ఎదురుచూసే వారి బలహీనతలను పెట్టుబడిగా మార్చుకుని, మోసగాళ్లు డబ్బులు వసూలు చేసే ప్రమాదం ఉందని టీమ్ హెచ్చరించింది. మా సినిమా తరఫున కాస్టింగ్ పేరుతో సంప్రదిస్తున్న ఏ వ్యక్తికీ మీ వ్యక్తిగత వివరాలు, ఫోటోలు లేదా డాక్యుమెంట్స్ షేర్ చేయవద్దు. ఈ సినిమా ఆడిషన్స్ లేదా సెలెక్షన్ల పేరుతో ఎవరైనా డబ్బులు అడిగితే నమ్మవద్దని, చిత్ర యూనిట్ రూపాయి కూడా ఆశించదని స్పష్టం చేశారు.

ఒకవేళ ఈ సినిమాకు సంబంధించి భవిష్యత్తులో ఏదైనా కాస్టింగ్ అవసరం ఉంటే, దానికి సంబంధించిన ప్రకటనలు కేవలం అధికారిక మరియు వెరిఫైడ్ సోషల్ మీడియా ఖాతాల ద్వారానే వస్తాయని మేకర్స్ స్పష్టం చేశారు. “జాగ్రత్తగా ఉండండి, మోసగాళ్ల బారిన పడవద్దు” అని చిత్ర బృందం సినిమా ఆస్పిరెంట్స్‌కు విజ్ఞప్తి చేస్తోంది. కాబట్టి సినీ అవకాశాల కోసం ప్రయత్నించే వారు ఇలాంటి ఫేక్ పోస్టుల పట్ల అత్యంత అప్రమత్తంగా ఉండటం అవసరం.