Tamannaah Bhatia: బాలీవుడ్, టాలీవుడ్ మధ్య తేడాలపై తమన్నా సంచలన వ్యాఖ్యలు!

మిల్కీ బ్యూటీ తమన్నా భాటియా గత రెండు దశాబ్దాలుగా అటు సౌత్ ఇండస్ట్రీలోనూ, ఇటు బాలీవుడ్‌లోనూ స్టార్ హీరోయిన్‌గా తన హవా కొనసాగిస్తోంది. రెండు వైపులా ఉన్న సినీ వాతావరణాన్ని క్షుణ్ణంగా పరిశీలించిన ఈ భామ, తాజాగా ఒక ఇంటర్వ్యూలో హిందీ వర్సెస్ సౌత్ సినీ ఇండస్ట్రీల పనితీరు, హీరోయిన్ల పాత్రల పరిమితులపై చేసిన కొన్ని బోల్డ్ కామెంట్స్ ఇప్పుడు నెట్టింట హాట్ టాపిక్‌గా మారాయి.

బాలీవుడ్ గురించి తమన్నా మాట్లాడుతుంటూ.. హిందీ సినిమా పరిశ్రమ నటీనటులకు ఒక రకమైన స్వేచ్ఛను ఇస్తుందని పేర్కొంది. “ప్రస్తుతం హిందీలో చూసుకుంటే ఒక వర్గానికి చెందిన నటీనటులు కేవలం కమర్షియల్ సాంగ్స్, డ్యాన్సుల వైపు వెళ్లడానికి పెద్దగా ఆసక్తి చూపించడం లేదు. నిజానికి వారు అలాంటి కమర్షియల్ ఫార్మాట్‌కు సెట్ అవ్వరు, అందులో రాణించలేరు కూడా. కానీ, అదే నటులు క్యారెక్టర్ ఓరియెంటెడ్ పాత్రలు చేసినప్పుడు మాత్రం అద్భుతంగా రాణిస్తారు, తెరపై మెరుస్తారు. హిందీ ఇండస్ట్రీలో ఆ చాయిస్ ఉంది” అని తమన్నా వివరించింది.

“సౌత్ సినిమా గురించి బయట రకరకాలుగా మాట్లాడుకుంటారు. ఇక్కడి మేకింగ్ చాలా స్పెసిఫిక్ పాయింట్ ఆఫ్ వ్యూలో ఉంటుందని, ఇదొక పితృస్వామ్య భావజాలం ఉన్న చోటని, మహిళలను చూసే కోణం పెద్దగా గౌరవప్రదంగా ఉండదని రకరకాల పేర్లు పెడుతుంటారు. కానీ, నేను అర్థం చేసుకున్న విషయం ఏంటంటే.. భారతదేశం ఒక మ్యూజికల్ కంట్రీ అయితే, సౌత్ ఇండస్ట్రీలో ఆ మ్యూజికల్, కమర్షియల్ ఎలిమెంట్స్‌ని స్క్రీన్ పై పండించాలన్నా, సక్సెస్ అవ్వాలన్నా సాలిడ్ ‘స్టార్ క్వాలిటీ’ ఉండాలి. అది అందరికీ సాధ్యం కాదు” అని తమన్నా స్పష్టం చేసింది.

“ఇది నా వ్యక్తిగత అనుభవం మాత్రమే, ఒక్కొక్కరికి ఒక్కోలా ఉండొచ్చు. కానీ సౌత్‌లో 10 నుండి 15 ఏళ్ల పాటు సుదీర్ఘ కెరీర్‌ను విజయవంతంగా కొనసాగించిన స్టార్ హీరోయిన్లను గమనిస్తే.. వారంతా ఖచ్చితంగా ఒకవైపు పర్ఫార్మెన్స్ ఓరియెంటెడ్ పాత్రలు చేస్తూనే, మరోవైపు మాస్ కమర్షియల్ సాంగ్స్, డ్యాన్సులను కూడా ఈక్వల్‌గా బ్యాలెన్స్ చేస్తూ మెప్పించారు. ఆ మ్యాజిక్ తెలిస్తేనే ఇక్కడ లాంగ్ కెరీర్ సాధ్యం” అని తమన్నా చెప్పుకొచ్చింది.