SS Karthikeya : “వారణాసి ఒక అగ్నిపర్వతం”

దర్శకధీరుడు ఎస్.ఎస్. రాజమౌళి వారసుడిగా సినీ పరిశ్రమలో అడుగుపెట్టిన ఎస్.ఎస్. కార్తికేయ.. ఇప్పుడు నిర్మాతగా తన మార్క్ క్రియేట్ చేసేందుకు సిద్ధమయ్యాడు. ప్రస్తుతం ఆయన ఎంతో ప్రతిష్టాత్మకంగా నిర్మిస్తున్న తాజా చిత్రం ‘డోంట్ ట్రబుల్ ది ట్రబుల్’. ఈ సినిమా ప్రమోషన్స్ లో భాగంగా ఇటీవల ప్రముఖ న్యూస్ ఛానెల్ ‘ఎన్టీవీ’కి ఇచ్చిన ప్రత్యేక ఇంటర్వ్యూలో కార్తికేయ చేసిన వ్యాఖ్యలు ఇప్పుడు టాలీవుడ్ వర్గాల్లో సంచలనంగా మారాయి. కార్తికేయ లైనప్ లో అందరి దృష్టిని విపరీతంగా ఆకర్షిస్తున్న భారీ ప్రాజెక్ట్ ‘వారణాసి’. ఎన్టీవీ ఇంటర్వ్యూలో ఈ సినిమా ఎలా ఉండబోతోందని అడిగిన ప్రశ్నకు కార్తికేయ కేవలం ఒకే ఒక్క పదంతో మైండ్ బ్లాంక్ అయ్యే హింట్ ఇచ్చాడు. ‘వారణాసి’ ఒక వాల్కేనో (అగ్నిపర్వతం) అంటూ ఆయన బదులివ్వడం ఇప్పుడు సోషల్ మీడియాలో హాట్ టాపిక్ గా మారింది.

ఒక అగ్నిపర్వతం బద్దలైతే లావా ఏ స్థాయిలో ఉప్పొంగుతుందో, దాన్ని చుట్టుపక్కల వాతావరణం ఎలా దద్దరిల్లిపోతుందో.. ‘వారణాసి’ సినిమా కూడా బాక్సాఫీస్ వద్ద అలాంటి విధ్వంసాన్నే సృష్టించబోతోందని కార్తికేయ మాటల ద్వారా స్పష్టమవుతోంది. ఈ కామెంట్ చూస్తుంటే సినిమాలో ఎమోషన్స్, యాక్షన్ సీక్వెన్సులు, విజువల్స్ ఏ స్థాయిలో ఉండబోతున్నాయో ఊహించుకోవచ్చు. అసలే రాజమౌళి కాంపౌండ్ నుంచి ఏ ప్రాజెక్ట్ వచ్చినా అది కచ్చితంగా పాన్ ఇండియా స్థాయిలో ప్రకంపనలు సృష్టిస్తుందని ప్రేక్షకులకు ఒక బలమైన నమ్మకం ఉంది. ఆ నమ్మకానికి ఏమాత్రం తగ్గకుండా కార్తికేయ తన సినిమాలను ప్లాన్ చేసుకుంటున్నాడు. ‘వారణాసి’ నేపథ్యంగా ఒక సరికొత్త ప్రపంచాన్ని, ఉత్కంఠభరితమైన కథాంశాన్ని ఈ సినిమాలో ఆవిష్కరించబోతున్నారని తెలుస్తోంది. ముందుగా ‘డోంట్ ట్రబుల్ ది ట్రబుల్’ సినిమాతో ప్రేక్షకులను సర్ ప్రైజ్ చేయబోతున్న కార్తికేయ.. ఆ తర్వాత ఈ ‘వారణాసి’ అనే అగ్నిపర్వతాన్ని థియేటర్లలో ఏ రేంజ్ లో బద్దలుకొట్టబోతున్నాడో చూడాలని సినీ అభిమానులు ఉత్కంఠగా ఎదురుచూస్తున్నారు.