శివ జొన్నలగడ్డ హీరోగా నటిస్తూ దర్శకత్వం వహిస్తోన్న చిత్రం ‘దమ్మున్నోడు’. దుమ్ము దులుపుతాడు అనేది ట్యాగ్ లైన్. ప్రియాంశ్, గీతాంజలి, స్వప్ప హీరోయిన్స్ గా నటిస్తున్న ఈ సినిమాను బాలాజీ కొండేకర్, రేణుక కొండేకర్ నిర్మిస్తున్నారు. ఈ సినిమా షూటింగ్ హైదరాబాద్ లో మంగళవారం ప్రారంభమైంది. సీనియర్ ప్రొడ్యూసర్ ప్రసన్న కుమార్ తొలి సన్నివేశానికి క్లాప్ నివ్వగా, మరో ప్రముఖ నిర్మాత తుమ్మలపల్లి రామసత్యనారాయణ కెమెరా స్విచాన్ చేశారు.
హీరో కమ్ డైరక్టర్ శివ జొన్నలగడ్డ మాట్లాడుతూ ‘నా కథ, టైటిల్ నచ్చి మా నిర్మాత బాలాజీ గారు ఈ సినిమాను నిర్మించడానికి ముందుకొచ్చారు. పవర్ ఫుల్ స్టోరీ, మాస్ ఎలిమెంట్స్, భారీ ఫైట్స్, సాంగ్స్ తో రూపొందుతోన్న సినిమా ఇది. ఈ రోజు ఫైట్ తో షూటింగ్ ప్రారంభించాం. ఇప్పటి వరకు నాకు ఫైట్స్ పరంగా మంచి పేరొచ్చింది. ఈ సినిమాతో డాన్స్ పరంగా కూడా పేరొస్తుందన్న నమ్మకం ఉంది. ఇందులో నాలుగు పాటలు అద్భుతంగా కుదిరాయి. మూడు షెడ్యూల్స్ లో సినిమాను పూర్తి చేస్తాం’ అన్నారు.
నిర్మాత బాలాజీ కొండేకర్ మాట్లాడుతూ… ‘సొలో ప్రొడ్యూసర్ గా నాకిది తొలి సినిమా. గతంలో జొన్నలగడ్డ శివ డైరెక్షన్ చేసిన సూపర్ పవర్ చిత్రానికి సహ నిర్మాతగా వ్యవహరించాను’ అని అన్నారు. ఈ కార్యక్రమంలో సంగీత దర్శకుడు ఎల్. ఎమ్ ప్రేమ్ , కొరియోగ్రాఫర్ బ్రదర్ ఆనంద్, హీరోయిన్ ప్రియాంశ్ పాల్గొన్నారు.
