SPIRIT : ప్రభాస్‌తో పెట్టుకుంటే ఇంతే సంగతులా? ‘స్పిరిట్’పై మాకు నమ్మకం లేదు?

టాలీవుడ్ రెబల్ స్టార్ ప్రభాస్ సినిమా అంటే బాక్సాఫీస్ దగ్గర వందల కోట్ల వర్షం కురవాల్సిందే. కానీ అదే సమయంలో రెబల్ స్టార్ సినిమా అనుకున్న సమయానికి థియేటర్లలోకి వస్తుందా అంటే మాత్రం  ఖచ్చితంగా చెప్పలేని పరిస్థితి. ప్రస్తుతం ప్రభాస్ క్రేజీ డైరెక్టర్ సందీప్ రెడ్డి వంగా కాంబినేషన్‌లో వస్తున్న‘స్పిరిట్‘ సినిమా విషయంలోనూ ఇదే చర్చ నడుస్తోంది.

గత కొంతకాలంగా ప్రభాస్ సినిమాల రిలీజ్ పరిస్థితి గమనిస్తే ఏదీ అనుకున్న సమయానికి రావడం లేదు. సినిమా షూటింగ్ ఆలస్యం కావడం లేదా పోస్ట్ ప్రొడక్షన్ పనుల వల్ల విడుదల తేదీలు మారడం డార్లింగ్ ఫ్యాన్స్‌కు అలవాటైపోయింది. “ప్రభాస్ సినిమా అంటే రిలీజ్ వాయిదా పడాల్సిందే” అనే ముద్ర పడిపోయింది. తాజాగా ‘స్పిరిట్’ సినిమాను 2027 మార్చి 5న విడుదల చేస్తామని ప్రకటించినప్పటికీ ట్రేడ్ వర్గాల్లో మాత్రం నమ్మకం కలగడం లేదు. ఈ భారీ ప్రాజెక్ట్ ఇప్పటివరకు కేవలం ఒకే ఒక షూటింగ్ షెడ్యూల్‌ను పూర్తి చేసుకుంది. ప్రభాస్ తన డేట్స్ కేటాయించడం షూటింగ్ స్పీడ్ పెంచడంలో జాప్యం జరుగుతోందనే వార్తలు ఫిలిం నగర్‌లో చక్కర్లు కొడుతున్నాయి. చేతిలో మూడు నాలుగు పెద్ద సినిమాలు ఉన్నప్పటికీ వాటిని సకాలంలో పూర్తి చేయడంలో ప్రభాస్ కొంత వెనకబడుతున్నారనే విమర్శలు వినిపిస్తున్నాయి. సినిమా ఎప్పుడు స్పీడందుకుంటుందో ప్రభాస్ పూర్తిస్థాయిలో డేట్స్ ఎప్పుడు ఇస్తారో తెలియని పరిస్థితి నెలకొంది. మరోవైపు చెప్పిన డేట్ కు వస్తామని మేకర్స్ చెప్తున్నా కూడా మాకు నమ్మకం లేదని ఫ్యాన్స్ కామెంట్స్ చేస్తున్నారు. ఒక్కో సినిమా కోసం రెండు మూడేళ్లు సెట్స్‌పైనే గడుపుతున్న ప్రభాస్, ‘స్పిరిట్’ను అనుకున్న టైమ్‌కు తీసుకొస్తారా లేక మరో కొత్త రిలీజ్ డేట్ వెతుక్కోవాల్సి వస్తుందా అనేది ఇప్పుడు మిలియన్ డాలర్ల ప్రశ్న. ఒకవేళ వాయిదా పడకుండా సినిమా రిలీజ్ అయితే మాత్రం అది టాలీవుడ్‌లో ఒక పెద్ద రికార్డుగానే మిగిలిపోతుంది.