Nara Rohith : వారసుడొచ్చాడు.. తండ్రయిన నారా రోహిత్!

టాలీవుడ్ యంగ్ హీరో నారా రోహిత్, ఆయన సతీమణి సిరి లేళ్ల దంపతులకు పండంటి మగబిడ్డ జన్మించాడు. ఇటీవల వైవాహిక బంధంతో ఒకటైన ఈ క్రేజీ కపుల్, ఇప్పుడు తమ జీవితంలోకి సరికొత్త అతిథిని ఆహ్వానిస్తూ తల్లిదండ్రులుగా ప్రమోషన్ పొందారు. ఈ శుభవార్త తెలియడంతో నారా, నందమూరి అభిమానులతో పాటు సినీ, రాజకీయ ప్రముఖులు సోషల్ మీడియా వేదికగా ఈ నూతన దంపతులకు శుభాకాంక్షలు తెలియజేస్తున్నారు.

‘బాణం’, ‘సోలో’, ‘ప్రతినిధి’ వంటి వైవిధ్యమైన సినిమాలతో టాలీవుడ్‌లో తనకంటూ ఒక ప్రత్యేకమైన గుర్తింపు తెచ్చుకున్న నారా రోహిత్, గతేడాది తనతో ప్రతినిధి -2 సినిమాలో కలిసి నటించిన సిరి లేళ్లను వివాహం చేసుకున్న సంగతి తెలిసిందే. ‘ప్రతినిధి 2’ సినిమాలో వీరిద్దరూ కలిసి నటించగా ఆ పరిచయం కాస్తా ప్రేమగా మారి, ఇరు కుటుంబాల సమక్షంలో వీరు వైవాహిక బంధంలోకి అడుగుపెట్టారు. పెళ్లయిన కొద్ది కాలానికే ఈ దంపతుల జీవితంలోకి ఒక చిన్ని వారసుడు అడుగుపెట్టడంతో నారా ఇంట పండగ వాతావరణం నెలకొంది. తల్లి, బిడ్డ ఇద్దరూ క్షేమంగా ఉన్నట్లు సమాచారం.