Mangli: మంగ్లీకి బిగ్ షాక్… ఇండస్ట్రీ నుంచి బహిష్కరించాలని ఫిర్యాదు!

ప్రముఖ నేపథ్య గాయని మంగ్లీ (సత్యవతి) చుట్టూ వివాదాల ఉచ్చు బిగుస్తోంది, తన గాత్రంతో కోట్లాది మంది అభిమానులను సంపాదించుకున్న ఆమె, ఇప్పుడు తీవ్రమైన ఆరోపణలు ఎదుర్కొంటున్నారు. మైక్రో ఫైనాన్స్ పేరుతో నిరుపేదలను మోసం చేశారనే ఆరోపణల నేపథ్యంలో, ఆమెను చిత్ర పరిశ్రమ నుంచి బహిష్కరించాలనే డిమాండ్ తెరపైకి రావడం టాలీవుడ్‌లో హాట్ టాపిక్ గా మారింది. మైక్రో ఫైనాన్స్ వ్యాపారం పేరుతో భారీగా నిధులు వసూలు చేసి, బాధితులకు అన్యాయం చేసిన వారితో సంబంధాలు ఉన్నాయనే ఆరోపణలు మంగ్లీపై వెల్లువెత్తాయి. ఈ క్రమంలో బాధితులు ఫిర్యాదు చేయడంతో పంజాగుట్ట పోలీస్ స్టేషన్‌లో ఆమెపై అధికారికంగా కేసు నమోదైంది. ఈ ఆర్థిక లావాదేవీల వ్యవహారంలో మంగ్లీ పాత్రపై పోలీసులు విచారణ జరుపుతున్నారు.

ఈ వివాదం కేవలం పోలీస్ స్టేషన్‌కే పరిమితం కాకుండా ఫిలిం నగర్ వర్గాల్లో ప్రకంపనలు సృష్టిస్తోంది. తెలంగాణ మూవీ ఆర్టిస్ట్ అసోసియేషన్ జనరల్ సెక్రటరీ సంపత్ నాయక్ ఈ విషయంలో చాలా ఘాటుగా స్పందించారు. నిరుపేదల రక్తాన్ని పిండి వసూలు చేసిన సొమ్ము విషయంలో బాధితులకు న్యాయం జరిగే వరకు మంగ్లీని వదిలిపెట్టకూడదని ఆయన డిమాండ్ చేస్తున్నారు. “బాధిత నిరుపేదలకు న్యాయం జరిగే వరకు మంగ్లీని సినిమా ఇండస్ట్రీ నుంచి బహిష్కరించాలి” అని తెలంగాణ MAA జనరల్ సెక్రటరీ సంపత్ నాయక్ పేర్కొన్నారు. సంపత్ నాయక్ ఈ విషయాన్ని సీరియస్‌గా తీసుకుంటూ, మంగ్లీపై చర్యలు తీసుకోవాలని కోరుతూ ప్రొడ్యూసర్ కౌన్సిల్‌కు అధికారికంగా ఫిర్యాదు చేశారు. ఒక సెలబ్రిటీ హోదాలో ఉండి ఇలాంటి అక్రమాలకు పాల్పడటం సరికాదని, బాధితులకు పూర్తి స్థాయిలో న్యాయం జరిగే వరకు ఆమెను సినిమాల నుంచి పక్కన పెట్టాలని ఆయన తన ఫిర్యాదులో పేర్కొన్నారు.